أفضل سرد لقصص أنبياء الله داود وسليمان ( عليهما السلام )

أفضل سرد لقصص أنبياء الله  داود وسليمان ( عليهما السلام )

 

وقفنا المرة إللي فاتت عند داود لما قتل جالوت وكان طالوت وعد داود إنه يزوجه ابنته ويكون وريثه في الملك،

ونفّذ طالوت وعده وزوجه ابنته، وأحب بنو إسرائيل داود،

مين بقى داود🤔

فاكرين لما اتكلمنا عن خلق آدم عليه السلام وإن ربنا مسح على ظهره وأراه ذريته، وكان كل واحد من أبناؤه كان في وجهه نور، ماعدا واحد بس كان النور ده شديد أوي،

فجذب انتباه آدم عليه السلام، فسأل ربنا عنه فقال له الله إن هذا داود فأعطاه آدم من عمره أربعين سنة عشان يكمل عمره مائة عام؟

أهو هو ده داود 😁

كان داود من نسل يعقوب عليه السلام...تولى حكم بني إسرائيل وأعطاه الله النبوة 👌

فكان أول نبي يجمع النبوة والملك بعد يوشع بن نون عليه السلام،

فاكرين لما قلنا إن المُلك كان في سِبط والنبوة في سِبط، دلوقتي اجتمعت تاني في داود عليه السلام😊

"وشَدَدْنَا مُلْكَهُ وَآتَيْنَاهُ الْحِكْمَةَ وَفَصْلَ الْخِطَابِ"

 

وربنا قال له إنه يحكم بين الناس بالعدل والحق ولا يتبع الهوى، يعني متحكمش لحد عشان هو قريبك أو صديقك ويكون الحق مش معاه،

ولا تحكم ضد عدوك بالظلم ويكون الحق معاه، وإلا هتكون من الضالين عن طريق الله وطريق الحق، وإللي بيضل عن الطريق هيكون من المعذبين عذاب شديد يوم القيامة لإنهم ما عملوش حساب وقفة يوم الجزاء👌

"يَا دَاوُودُ إِنَّا جَعَلْنَاكَ خَلِيفَةً فِي الْأَرْضِ فَاحْكُمْ بَيْنَ النَّاسِ بِالْحَقِّ وَلَا تَتَّبِعِ الْهَوَى فَيُضِلَّكَ عَنْ سَبِيلِ اللَّهِ إِنَّ الَّذِينَ يَضِلُّونَ عَنْ سَبِيلِ اللَّهِ لَهُمْ عَذَابٌ شَدِيدٌ بِمَا نَسُوا يَوْمَ الْحِسَابِ "

 

☆ربنا بيقول الكلام ده لداود النبي... فما بالنا بينا احنا😞

 

عاش داود عليه السلام مع بني إسرائيل في القدس، وكان بيحكم بينهم بالعدل، ومع إنه كان ملك لكنه كان بيشتغل ، كان بيصنع دروع،

عارفين دروع الحرب إللي كان بيلبسها الجنود زمان عشان تحميهم في الحروب 🤔

أهو أول واحد اخترع الدروع دي كان داود عليه السلام بتعليم الله له.. وكان الموضوع سهل على داود عليه السلام، لإن ربنا أعطاه له آية أو معجزة، وهي معجزة لِين الحديد بين يديه،

يعني لما كان يمسك الحديد كان يقدر يشكِّله ويتحكم فيه من غير ما يضطر الأول يسخنه جاااامد جدا عشان يبقى طري ويتمكن من تشكيله،

يعني الحديد في إيده كان بيتشكل بسهولة زي العجينة الطرية إللي بنشكلها ونعمل منها مخبوزات😅

 "وَأَلَنَّا لَه الْحَدِيدَ"

فكانت الدروع إللي بيعملها دقيقة جدا، خفيفة فمش بتعُوق الجنود في الجهاد، وفي نفس الوقت معمولة بإتقان يحميهم من ضربات العدو.

"وَعَلَّمْنَاهُ صَنْعَةَ لَبُوسٍ لَّكُمْ لِتُحْصِنَكُم مِّن بَأْسِكُمْ "

 

☆طيب وإيه المشكلة يعني لو ملبسوش دروع ؟

ما يموتوا وخلاص ومفيش داعي يحموا نفسهم من ضربات العدو...مش إللي بيموت في سبيل الله بيكون شهيد😕

أيوة الشهادة في سبيل الله أقصى ما يتمنى الإنسان، لكن نتخيل كده لو كلنا متنا في سبيل الله مين إللي هينشر دين ربنا؟ مين إللي هيعلم الناس ويخرجهم من ظلمات الكفر؟

ثم في المعارك لازم الأخذ بالأسباب إني أستمر على قيد الحياة أكبر وقت ممكن👌

بحيث إني أزود عدد القتلى والخسائر إللي في صفوف العدو وأساعد جيش المسلمين بأكبر طاقة ممكنة، مش أدخل المعركة من غير أي عُدة ولا عتاد ولا دروع ولا خطط دفاعية، وأخلي الأعداء يقتلوني بحجة الشهادة😶

ده رسول الله ﷺ وهو رسول الله كان بيلبس الدروع وبيجهز الجيوش بالعتاد الكافي للقتال أطول فترة ممكنة لإجبار العدو على الانسحاب وإعلان هزيمته،

وبيعمل الخطط الدفاعية المُحكمة👌

فقبل الدخول في أي معركة لازم يكون الجنود مُجهّزين إيمانيًا، وكمان مُجهّزين على حسب استطاعتهم بالقوة والسلاح💁‍♂️

وربنا بيقول:

"وَأَعِدُّوا لَهُم مَّا اسْتَطَعْتُم مِّن قُوَّةٍ وَمِن رِّبَاطِ الْخَيْلِ "

 

داود عليه السلام برغم مُلكُه وشُغله في الحِدادة كان عابد لله، وكان بيصوم يوم ويفطر يوم، وده أفضل الصيام كما قال رسول الله ﷺ:

"إن أفضل الصيام صيام داود: كان يصوم يوماً ويفطر يوماً"

وربنا أنزل على داود عليه السلام الزَّبُور .. وكلمة الزبور نفسها معناها الكتاب، وكان الزبور عبارة عن حِكَم ومواعظ مكنش فيه حلال وحرام،

عارفين كمثال: زي آيات الترغيب والترهيب في القرآن كده🤔

فكان داود يقرأها ويدندن بيها ويتغنّى في قراءتها ويحسّن بيها صوته وكان صوته جميل جدا مفيش لصوته مثال، بينضرب بيه المثل في الأصوات الجميلة.. يعني لو قلنا إن يوسف عليه السلام أخد جمال الشكل، فداود عليه السلام أخذ جمال الصوت 😅

 

☆وبالمناسبة داود عليه السلام مكنش بيستعمل المزمار زي ما الناس فاهمة، يعني رسول الله ﷺ  لما قال لأبي موسى الأشعري لما سمع تلاوته للقرآن:

" لقد أُوتيتَ مزمارًا من مزامير آل داود"

مكنش يقصد إن معاه مزمار موسيقي في بيته، لكن يقصد إن صوته حلو شبيه بصوت المزمار، فالموضوع مجرد تشبيه فقط👌

 

كان من جمال صوت داود عليه السلام ، إن الطيور والوحوش والجن والإنس بيتجمعوا حواليه يسمعوا تلاوته للزبور، ومبيتحركوش خااالص من شدة الاستماع بتركيز وإنصات وتأثر😮

شوفوا كده لما بنسمع حد صوته حلو في القرآن مثلا ولاّ الأناشيد، بنكون عاملين إزاي😳

أهو ده ما يجيش ذَرَّة في جمال صوت داود عليه السلام👌

حتى إن الجبال والطيور كانت بتسبّح معاه لما تسمع صوته بالتسبيح،

 "إنَّا سَخَّرْنَا الْجِبَالَ مَعَهُ يُسَبِّحْنَ بِالْعَشِيِّ وَالإِشْرَاقِ.. والطير محشورةً كل له أوَّاب.."

وكان عليه السلام مقسّم أيامه:

يوم يتعبد فيه لله، ويوم يسمع فيه خصومة الناس ويحكم بينهم، ويوم لأشغاله ونسائه..

 

☆وده يعلمنا إننا منسيبش نفسنا كده بدون تخطيط وزي ماتيجي تيجي😶

لما نقسم وقتنا بين أمور الدنيا وأمور الآخرة هنرتاح جدا وهنعرف نركز وننجز بإذن الله،

 

 في يوم من الأيام إللي كان داود عليه السلام مخصصه للعبادة، في اتنين من الأشخاص تسلّقوا سور المكان إللي كان بيتعبد فيه، ودخلوا عليه فجأة،

فاتخض وخاف زي أي بشر، وده من الخوف الفطري الطبيعي إللي مفيش حرج فيه، ولا ينتقص من عبودية الخوف من الله شيء،

دي حاجة ودي حاجة..

يعني الخوف من الله فقط مقصود بيها إن لو حد هيعاقبني بشيء لو مسمعتش كلامه وكلامه ده فيه معصية لله عز وجل، أقوم أنا أسمع كلامه عشان خايف من عقابه ومخفش من عقاب ربنا على المعصية دي،

يبقى أنا كده إيماني ناقص وفيه مشكلة لازم تتعالج👌

لكن الخوف من الحاجات إللي فعلا تخوّف في الحياة بصفة عامة فده طبيعي ومفيهوش حرج شرعي..

فداود خاف من إللي دخلوا عليه فجأة دول، فهو وإن كان نبي فهو بشر👌

"وَهَلْ أَتَاكَ نَبَأُ الْخَصْمِ إِذْ تَسَوَّرُوا الْمِحْرَابَ إِذْ دَخَلُوا عَلَى دَاوُودَ فَفَزِعَ مِنْهُمْ"

فطمنوه، وقالوا له ما تخافش مننا، إحنا مش جايين في شر أو ضرر ليك، ده إحنا الإثنين اختصمنا في شيء وجايين عشان عاوزينك تحكم بينا فيه بالعدل وتشوف الحق مع مين😅

"قَالُوا لَا تَخَفْ خَصْمَانِ بَغَى بَعْضُنَا عَلَى بَعْضٍ فَاحْكُمْ بَيْنَنَا بِالْحَقِّ وَلَا تُشْطِطْ وَاهْدِنَا إِلَى سَوَاءِ الصِّرَاطِ"

 

وبدأ أول واحد فيهم يحكي المشكلة قال:

ده أخويا عنده تسعة وتسعين شاة، يعني عنده خير كثير من الأنعام يخليه قنوع وميبصش لغيره في رزقه.. وأنا عندي نعجة واحدة بس،

فأخويا رغم غِناه ده كله قال لي أعطني النعجة بتاعتك دي، وغلبني في الكلام ومعرفتش أرد عليه😶

"إِنَّ هَذَا أَخِي لَهُ تِسْعٌ وَتِسْعُونَ نَعْجَةً وَلِيَ نَعْجَةٌ وَاحِدَةٌ فَقَالَ أَكْفِلْنِيهَا وَعَزَّنِي فِي الْخِطَابِ"

فقال داود عليه السلام :

"لَقَدْ ظَلَمَكَ بِسُؤَالِ نَعْجَتِكَ إِلَى نِعَاجِهِ وَإِنَّ كَثِيرًا مِنَ الْخُلَطَاءِ لَيَبْغِي بَعْضُهُمْ عَلَى بَعْضٍ إِلَّا الَّذِينَ آمَنُوا وَعَمِلُوا الصَّالِحَاتِ وَقَلِيلٌ مَا هُمْ"

يعني داود  عليه السلام حكم للي اتكلم ده، من غير ما يسمع لأخوه، إللي هو الطرف التاني من الخصومة او المشكلة،

وكان حكمه إن الأخ التاني ده هو إللي ظالم لما طلب منك الشاة الواحدة إللي معاك في حين إن هو عنده تسع وتسعين نعجة غيرها،

وقال له للأسف كتير من الشركاء والأخلّاء بيبغِي بعضهم على بعض، إلا طبعا إللي عنده من الإيمان بالله والعمل الصالح ما يمنعه من الظلم.. وما أقلهم👌

وبعدين انتبه داود عليه السلام لكلامه وتيّقن إن ده كان اختبار من ربنا عز وجل في الحكم بين الناس بضوابط القضاء العادل،

ولكنه عليه السلام اتسرّع واتعجل في الحكم لما أشفق على الطرف إللي بيحكي، فاستغفر ربنا وسجد لله وتاب عن ده،

"وَظَنَّ دَاوُودُ أَنَّمَا فَتَنَّاهُ فَاسْتَغْفَرَ رَبَّهُ وَخَرَّ رَاكِعًا وَأَنَابَ"

 

واحنا قلنا قبل كده إن الانبياء معصومين من الكفر والشرك والكبائر و الصغائر التي تدل على الخسة والدناءة،

لكنهم غير معصومين من الخطأ العادي زي ما حصل مع يونس عليه السلام.. وزي ما حصل مع داود عليه السلام هنا 😊

 

☆طيب وهو فين الخطأ إللي وقع فيه داود عليه السلام😕

◇أولا:

إنه استمع لخصم واحد فقط ومسمعش من الطرف التاني في الخصومة مع إنه واقف قصاده كمان، فكان مفروض زي ما سمع من الأول كان لازم يسمع من التاني قبل ما يحكم أي حكم.. مش يمكن التاني هو إللي معاه الحق🤷‍♂️

◇ثانيا:

إنه حكم للشخص الأول بظاهر الأمور من غير ما يعرف هل  كلامه حقيقي فعلا وصدق ولّا مزود كلام من عنده؟

مش يمكن القصة محصلتش بالشكل ده؟ مش يمكن ناقصة حتة مهمة جدا تخليه ظالم مش مظلوم؟

 

☆فاحنا لازم ناخد بالنا لما يجيلنا أي شخص عايز مشورة  وبيشتكي من حد تاني، متتبرعش مباشرة بدعم موقفه وتسخن على صاحبه وإنت أصلا ماسمعتش من الطرف التاني،

وممكن إللي بيحكيلك يكون هو إللي غلطان أصلا وهو سبب الكارثة🤦‍♂️

ولو تفتكروا في قصة يوسف عليه السلام،

إخوة يوسف جاءوا أباهم يبكون... أي حد معدي ما يعرفهمش كان هيتعاطف معاهم، في حين إن همّ إللي كانوا مجرمين أصلا مش مجرد مظلومين حتى😅

ويا سلام لو أخت بتحكي عن مشكلة بينها وبين زوجها في الجروبات 😳

تلاقي كل واحدة تقولها وإيه إللي يصبرك على زوج بالاخلاق دي؟!.. اطلقي منه طبعا... فدي مش معصية واحدة هنا، ده ذنب مُرَكَّب من كذا معصية لا يتسع المقام لتحليلها،

والسبب في الجرأة دي بيكون دايما إن الناس ناسيين

"ما يلفظ من قول إلا لديه رقيب عتيد"..

"مَنْ يَشْفَعْ شَفَاعَةً حَسَنَةً يَكُنْ لَهُ نَصِيبٌ مِنْهَا وَمَنْ يَشْفَعْ شَفَاعَةً سَيِّئَةً يَكُنْ لَهُ كِفْلٌ مِنْهَا ".👌

ثم حتى لو سمعت من الطرفين واتضح إن الكلام متطابق وفيه ظالم ومظلوم، ما تسخنش حد على حد،

إنت دورك هنا تفض نزاع بالعدل أيوة، لكن ليك دور تاني إنك تؤلف بين القلوب وتلطف الجو بين الطرفين💁‍♂️

 

 فلما داود عليه السلام إللي هو نبي، وقع في الخطأ ده وهو الحكم من غير ما يسمع من الطرفين تاب واستغفر، فما بالكم بينا إحنا 😶

واحنا ممكن نكون بنقع في الخطأ ده كتير واحنا مش حاسين😞

فلما تاب داوود عليه السلام واستغفر، تاب الله عليه وأثنى عليه 😊

"فَغَفَرْنَا لَهُ ذَلِكَ وَإِنَّ لَهُ عِنْدَنَا لَزُلْفَى وَحُسْنَ مَآبٍ"

 

☆وده يعلمنا طبعا إننا لما نذنب نسارع بالتوبة والاستغفار و الاعتذار لله عز وجل،

 "وَسَارِعُوا إِلَىٰ مَغْفِرَةٍ مِّن رَّبِّكُمْ"

فالتوبة لازم تكون فورية على طول بدون تأجيل وتسويف مهما اتكرر الذنب ده، وربنا بيغفر وبيرحم إللي بيتوب إليه يستغفره 👌

 

داود عليه السلام كان عنده أبناء كتير، وكان عنده ابن مميَّز .. كان اسمه سليمان،

كان سليمان بيساعد داود عليه السلام في أمور الحُكم وحل المشاكل والخصومات إللي بين بني إسرائيل.

من الأحداث إللي حصلت إن امرأتين اختصمتا إلى داود عليه السلام،

 يعني جم قاصدينه في حل مشكلة بينهم، وكان معاهم طفل رضيع كانت المرأة الكبيرة ماسكاه في إيدها،

فالكبيرة دي قالت إن الطفل الرضيع ده ابنها، والصغيرة قالت لأ ده ابني أنا ، والذئب أكَل ابن أختي الكبيرة دي،

فداود عليه السلام حَكَم للكبيرة، إما على أساس الشَبه إللي بينها وبين الطفل، أو على أساس إنه كان معاها هي في إيدها شايلاه؛ لإن مكنش فيه قدامه دليل أقوى من ده يقدر يحسم بيه القضية🤷‍♂️

فلما خرجت المرأتين من عند داود عليه السلام، كان سليمان عليه السلام موجود،

فعرضت الصغيرة القصة مرة ثانية عليه،

فقال هاتوا السكين أقطعه بينكم وكل واحدة تاخد نص ليها، فصرخت الصغيرة وقالت لأ هو ابنها خلاص متئذيهوش😥

فحكم سليمان عليه السلام بالطفل الرضيع للصغيرة؛

لأنه عارف شفقة الأم وعارف إن أمه ممكن تتحمل فراقه بعيد عنها لكن ما تتحملش إنه يتعرض لألم أو قتل قدام عنيها ويكون بسببها كمان،

 

☆ومن الحِيل المُشابهة إللي استعملها القضاة برده ، إن رجلين  اختصموا عند قاضي، فالمظلوم قال للقاضي:

أنا أقرضت الراجل ده فلوس وهو مش راضي يرجعهالي، وبيقول ما أخدتش منك حاجة😥

فالقاضي قال له: هل معاك شاهد؟.. فالمظلوم قال لأ،

فالقاضي سأل: طب هل في أي علامة معينة؟

فالمظلوم قال: أقرضته الأموال عند شجرة كذا...

فالقاضي قال له:

طيب روح عند الشجرة واستنى هناك.. وخلّى الراجل التاني يستنى معاه في  مجلس القضاء..

فبدأ القاضي يقضي بين الناس ، والراجل التاني قاعد جنبه، وبعد شوية قليلة سأله القاضي فجأة:

تفتكر صاحبك يكون وصل للشجرة🤔 .. فالراجل قال له:

 لأ.. مايلحقش لأنها بعيدة😕

فالقاضي قال له: باااس تعال بقى ..عرفت منين مكان الشجرة وانت بتنكر أصلا الموضوع كله وإنك تعرف الشجرة😈

فمبقاش قصاده غير إنه يعترف 😄😄

و دي من الحِيل المشروعة إللي ممكن نستعملها لو هتؤدي لاسترجاع الحق الحق من المنكرين😁

طب إيه المواقف التانية إللي حصلت برده مع سليمان .....؟

 

 من المواقف إللي حصلت برده مع سليمان .....

 

 

 

اتكلمنا المرة إللي فاتت عن داود عليه السلام وعرفنا إنه أول نبي يجمع بين النبوة والملك في بني إسرائيل،

وداود عليه السلام كان أول نبي من بني إسرائيل يحكم معظم أرض فلسطين حكم إيماني لمدة أربعين سنة👌

 

☆إيه ده، هل معنى كده إن أرض فلسطين والقدس بتاعة اليهود زي ما بيقولوا😳

طبعا لأ مش بتاعتهم إطلاقا 👌

لإن القدس وفلسطين وبلاد الشام بصفة عامة فُتحت في عهد عمر بن الخطاب رضي الله عنه وبقت تحت حكم المسلمين،

وأي دولة تُفتح وتُحكم بحكم الإسلام خلاص بقت بتاعة المسلمين ولو مر الزمن وتم احتلالها بيبقى واجب على المسلمين استرجاعها 👌

زي القدس في الوقت الحالي

 

من الأحداث إللي حصلت في حياة داود عليه السلام

قصة رواها ابن عباس رضي الله عنه إن رجلين اتنين  اختصموا عند داود عليه السلام،

الأول قال إن الرجل التاني أخد البقر بتاعه بالغصب، لكن الرجل الثاني أنكر الموضوع... فأجّل داود عليه السلام الحكم في الموضوع بتاعهم لوقت الليل، فربنا أوحى له إنه يقتل الرجل المُدّعِي😳

فتاني يوم داود عليه السلام قال للرجل الأول - إللي هو 《المُدَّعِي》- قولي حقيقة الموضوع .. ربنا أوحى لي إني أقتلك 😶

فالرجل قال: والله يا نبي الله أنا صادق في كلامي والرجل ده فعلا أخد البقر بتاعي غصبا😔

لكن أنا قتلت أبوه من غير ماحد يعرف 😞.. فأمر داود علي السلام إن الراجل يُقتل قَصاصًا 👌

 

ومن الأحداث إللي حصلت برده وكان لسليمان الابن المتميز لداود عليه السلام دور فيه،

رجلين جاءوا اختصموا عند داود عليه السلام، واحد عنده أغنام والثاني عنده أرض زراعية،

فكان لما ييجي الليل⛼ كان صاحب الغنم يدخل غنمه الحظيرة.. ففي ليلة من الليالي الغنم🐐 طلعت من الحظيرة وراحت الأرض الزراعية بتاعة الرجل الثاني وقعدت تاكل منها وأفسدتها،

ربنا قال عنها في القرآن:

"وَدَاوُودَ وَسُلَيْمَانَ إِذْ يَحْكُمَانِ فِي الْحَرْثِ إِذْ نَفَشَتْ فِيهِ غَنَمُ الْقَوْمِ وَكُنَّا لِحُكْمِهِمْ شَاهِدِينَ"

وطبعا صاحب الغنم مسؤول عن أغنامه في الليل إنه لازم ياخد باله منها ويقفل عليها كويس ويتأكد إنها مش مطلوقة على حد،

بعكس بالنهار ليس عليه أي حرج لما الغنم يخرج للرعي ويدخل أرض زراعية بالغلط، لأن ساعتها بيبقى في أكثر من طريقة لمنعها...

لكن في الليل الكل نايم فمين إللي هيمنعها غير راعيها🤷‍♂️ فالإشكالية إن الغنم أفسدت الأرض في الليل،

فلما راح الراجل صاحب الأرض لداود عليه السلام يشتكي، فحكم له داود عليه السلام إنه ياخد الغنم بتاعة الرجل وتبقى بتاعته،

فسليمان بن داود عليه السلام قال إنه عنده رأي ثاني وهو:

إن الرجل صاحب الغنم ياخد الأرض الزراعية يصلّحها،

ولما ترجع زي ماكانت يرجّعها لصاحبها، وإن الراجل صاحب الأرض الزراعية ياخد الغنم يستفيد منها لحد ما أرضه تتصلح وترجعله،

فوافق الرجلين على حل سليمان ورضيوا به أكتر من الحل بتاع داود عليه السلام😊..

"فَفَهَّمْنَاهَا سُلَيْمَانَ ۚ وَكُلًّا آتَيْنَا حُكْمًا وَعِلْمًا"

 

☆طيب هل معنى كده بقى إن سليمان أعلم من داود😕

لأ..ربنا أعطى داود وسليمان العلم، لكن مش كل إنسان عنده علم لازم يكون عالم بكل المسائل،

وربنا قال عن داود عليه السلام :

"وآتيناه الحِكمة وفصلَ الخطاب"

فعادي جدا لما تَخفَى عليه بعض المسائل ويكون فيها حل أحكم من حله أو أرجح منه 💁‍♂️

فمش شرط إن الإنسان يفهم كل قضية جزئية عشان نقول إنه فاهم😅

 

◇وزي قصة حرامي الإِوَز 😅

 والقصة هي إن في رجل راح اشتكى لإمام المسجد إن الإِوَز بتاعه بيتسرق من جيرانه لكنه مش عارف مين هو بالضبط،

فبعد الصلاة قال للناس:

إن جار فلان بيسرق الإِوَز بتاعه وبيدخل المسجد وهو على راسه ريش الوز، فواحد من إللي قاعدين مسح على راسه، فعرف إن هو إللي بيسرق الإوز😄

 

عاش داود عليه السلام مائة عام، وحكم بني إسرائيل أربعين سنة، وكان شديد الغيرة على نسائه،

فكان لما يخرج بيقفل كل الأبواب لا حد يدخل ولا حد يخرج ، لحد ما يرجع..

ففي يوم خرج والأبوب اتقفلت كالعادة، فشافت زوجة من زوجاته رجل في وسط البيت فاتعجبت جدا وقالت:

دخل منين ده، ودخل وسط البيت إزاي والأبواب مقفولة😳   جاء داود عليه السلام والرجل لسه قائم في وسط الدار زي ماهو، فداود سأله إنت مين؟

فالراجل قال له: أنا إللي مبخافش من الملوك، ومفيش حد يقدر يمنع نفسه عني👌

فعرفه داود عليه السلام وقال له: انت ملك الموت، فأهلا بأمر الله ...

فقبض ملك الموت روحه في نفس مكانه.. بس كده😐

في لحظة معينة ربنا مقدرها ومكتوبة في اللوح المحفوظ حياة داود عليه السلام انتهت😞

ورحّب بملك الموت، وطبيعي إنه يرحب بيه، لإنه إنسان عاش طائع..عادل.. مؤمن، شديد التقوى لله عز وجل، أواب وكثير العبادة،

فإزاي ميفرحش بالموت وهو البوابة إللي هيعدي منها للجنة ولقاء الله😊

 

☆نسأل نفسنا لو ملك الموت جاء دلوقتي يقبض أرواحنا ، هل هنرحب بيه ،ولّا هنقول استنى بس أروح أمسح مقاطع الأغاني  وصور المنكرات إللي أنا ناشرها على شبكات التواصل،

وأَلحق أرجع للناس فلوسها إللي عليّ وأظبط حجابي وأطلب العفو من إللي أنا آذيتهم؟!

هل هرحب بيه، ولا هقوله استنى أمسح أرقام صُحبة السوء من على تليفوني وأروح اقرأ قرآن واستغفر وأتوب وأعمل الصالحات و...و...

أنا شخصيا شوفت منشور على الفيس لبنت بتتكلم فيه عن كمية المسلسلات التركية إللي اتفرجت عليها والأفلام الأجنبية...

وبعدها بأيام بسيطة ماتت، فجأة كده بدون مقدمات 😔

تعتقدوا لو كانت تعرف إنها هتموت خلال أيام كانت نشرت الكلام ده😞

ولّا كانت على الأقل هتنشر كلام يكون صدقة جارية ليها؟

هي معملتش ... إحنا نعمل.. في الوقت إللي إحنا مكسلين فيه عن قول سبحان الله وبحمده أو قول استغفر الله،

في ملاييين تحت الأرض نفسهم يرجعوا عشان يقولوا الكلمتين دول... والسعيد من وُعِظَ بغيره👌

أسأل الله العظيم رب العرش العظيم أن يرحمها و يتجاوز عنها ويغفر لها وأموات المسلمين أجمعين🤲

 

بعد موت داود عليه السلام ورثه ابنه المميز سليمان 👌

"وَوَرِثَ سُلَيْمَانُ دَاوُودَ "

والورث هنا مش وِرث أموال لكن وِرث العلم والنبوة،

لإن إللي الأنبياء بيتركوه خلفهم من أموال بيكون مصيره الصدقة، ولا يَرِث الأقارب منهم أبدا زي باقي البشر،

 وسليمان عليه السلام وكل أنبياء بني إسرائيل على شريعة موسى عليه السلام حتى يأتي عيسى عليه السلام،

وكان سليمان عليه السلام ذكي زي ما شفنا من المواقف بتاعته،

وربنا أنعم عليه بنعم كثيرة منها القوة وسرعة البديهة، ومنها إنه علمه لغة الطيور... يعني لما يسمع صوت الطيور يفهم هم بيتكلموا عن إيه😊

"وَقَالَ يَا أَيُّهَا النَّاسُ عُلِّمْنَا مَنطِقَ الطَّيْرِ وَأُوتِينَا مِن كُلِّ شَيْءٍ إِنَّ هَذَا لَهُوَ الْفَضْلُ الْمُبِينُ"

ومن القصص إللي يرويها ابن كثير عن فهم سليمان عليه السلام لكلام الطير،

إنه عدّى على عصفور🐦 عمال يلف حوالين عصفورة🐥، فقال لأصحابه: عارفين بيقولها إيه😅

فقالوا : بيقول إيه🤔

قال سليمان عليه السلام:

بيخطبها لنفسه وبيقول لو اتجوزتيني سأُسْكنك في أي غرف دمشق انتِ عايزاها،

لأن غرف دمشق مبنية من الصخر، مش أي حد يقدر يسكنها،

ولكن كل خاطب كذاب👌

 

☆سبحان الله زي عندنا بالضبط😅

قبل الخطوبة والزواج تلاقيهم عاملين البحر طحينة وبعد الزواج مفيش لا بحر ولا طحينة🤷‍♂️

إلا من رحم الله طبعا😁

 

كان سليمان عليه السلام عنده زوجات كتير برده، ففي يوم من الأيام قال:

"لَأَطُوفَنَّ اللَّيْلَةَ علَى سَبْعِينَ امْرَأَةً، تَحْمِلُ كُلُّ امْرَأَةٍ فَارِسًا يُجَاهِدُ في سَبيلِ اللَّهِ، فَقالَ له صَاحِبُهُ:

إنْ شَاءَ اللَّهُ، فَلَمْ يَقُلْ، ولَمْ تَحْمِلْ شيئًا إلَّا واحِدًا، سَاقِطًا أَحَدُ شِقَّيْهِ، فَقالَ النبيُّ ﷺ: لو قالَهَا لَجَاهَدُوا في سَبيلِ اللَّهِ.

يعني هو قال إنه هيدخل على مائة امرأة كل واحدة منهن ستحمل منه ولد، ولما يتولدوا ويكبروا هيكونوا كلهم فرسان يقاتلوا في سبيل الله،

فصاحبه قال له قل إن شاء الله لكنه نسي ولم يقل إن شاء الله،

فمفيش ولا واحدة فيهم أنجبت، إلا واحدة بس ولدت نصف إنسان، يعني إنسان غير مكتمل👌

ولو كان قال إن شاء الله كان ربنا رزقه فعلا بمائة فارس يقاتل في سبيل الله،

قال تعالى:

"وَلَقَدْ فَتَنَّا سُلَيْمَانَ وَأَلْقَيْنَا عَلَىٰ كُرْسِيِّهِ جَسَدًا ثُمَّ أَنَابَ"

فالمقصود بالجسد هنا هو المولود إللي جاءت به القَابِلة لسليمان وهو على كرسيه عشان يشوفه، والقابلة يعني الدّاية إللي بتولّد،

فكانت الفتنة والاختبار في المولود ده، يعني حصلت له خيبة أمل في إللي كان ناوي يعمله بإنه يخلّف مائة أو تسعين ولد كلهم يقاتلوا في سبيل الله،

لكن ده محصلش لأنه مقلش إن شاء الله👌

فمع إن الغاية بتاعته نبيلة وهدفه من الأبناء هو الجهاد في سبيل الله؛ لكن سنن ربنا مش بتحابي حد، إلا ما شاء الله، وربنا هنا أراد إنه يعلم سيدنا سليمان درس مهم ويعملنا من بعده إن تقديم المشيئة دايما قبل أي عمل هو من أعظم أسباب التوفيق فيه بإذن الله وحوله وقوته، ومن أهم صفات العبودية👌

 

☆حتى مع رسول الله ﷺ ، لما المشركين سألوه عن أصحاب الكهف وعن الروح وعن ذي القرنين، فقال لهم هقول لكم بكرة ولم يقل إن شاء الله، فتأخر الوحي خمسة عشر يوم وبعدها نزلت سورة الكهف تجاوب على الأسئلة،

وفيها الآية:

"ولا تقولنَّ لشيء إني فاعلٌ ذلك غدًا إلا أن يشاء الله، واذكر ربك إذا نسيتَ وقل عسى أن يهديني ربّي لأقرب من هذا رَشَدًا ".

◇وهنعرف قصة أصحاب الكهف و ذو القرنين بعدين إن شاء الله.

 

لما سليمان عليه السلام شاف إن إللي كان عايزه محصلش حاسب نفسه وراجعها وعرف خطأه وتاب واستغفر،

وده يعلمنا لما دعوتنا متتحققش نراجع نفسنا يمكن في أمر بنعمله أو عملنا حاجة من موانع الإجابة، فيمكن محتاجين توبة واستغفار تبصّرنا بعيوبنا وتخلينا نتفادى ده في المستقبل👌

 

بعد ما سليمان عليه السلام  تاب واستغفر، طلب من ربنا طلب عجيب جدا🤨

قال: يارب اوهبني مُلك محدش شاف زيه ولا أخد مثيله غيري،لا قبلي ولا بعدي ... مُلك يكون ليّ أنا بس🤲

"قَالَ رَبِّ اغْفِرْ لِي وَهَبْ لِي مُلْكًا لَّا يَنبَغِي لِأَحَدٍ مِّن بَعْدِي ۖ إِنَّكَ أَنتَ الْوَهَّابُ"

☆إيه ده 😳

هو إزاي سليمان عليه السلام يطلب مُلك الدنيا والمعروف إن الناس المتعلقة بالدنيا هي إللي بتطلب مُلك الدنيا😕

ثم ليه يعني يقول إن محدش بعده ياخد نفس مُلكه، هيضره في إيه لو حد تاني ربنا آتاه مُلك زي بتاعه😑

◇أولا:

هو طلب مُلك الدنيا ساعتها عشان كان عايز يعرف منزلته عند ربنا لما يعطيه إللي هو طلبه منه، وإنه قبل توبته😊

 

◇ثانيا :

 لما قال إن محدش تاني يحصل على الملك ده: كان المقصود إن المُلك إللي هتديهولي يكون بتاعي محدش يقدر ياخده مني،

ومفيش حد من أهل زماني يكون عنده زيه، فيكون المُلك ده معجزتي وعلامة نبوتي بين الناس، ويكون حاجة خاصة بيّ تخصني بها عن سائر البشر👌

فربنا استجاب له ورزقه بجيش مش زي أي جيش🙊

مفيش حد على الأرض إلى قيام الساعة هيمتلك مُلك ولا جيش زي جيش سليمان عليه السلام👌

ليه بقى؟

لإن كان عنده جيش من الجن وجيش من البشر وجيش من الطير، وربنا علمه لغات كل المخلوقات دي.

"وَحُشِرَ لِسُلَيْمَانَ جُنُودُهُ مِنَ الْجِنِّ وَالإِنسِ وَالطَّيْرِ فَهُمْ يُوزَعُونَ"

فكان بيخرج للجهاد لنشر الإسلام لأنه كان ملك للأرض ونبي، فكان لازم يعلم الناس التوحيد👌

ففي مرة وهو راجع مع جيوشه، سمع صوت بيقول:

يا جماعة خدوا بالكم أحسن سليمان وجنوده يقتلوكم وهم مش واخدين بالهم😥

مين إللي اتكلم ده وقال الكلام ده 🤔

 

 

 

كنا واقفين المرة إللي فاتت عند سليمان عليه السلام لما كان راجع من الجهاد وسمع صوت بيتكلم،

كان إيه الصوت ده بقى😁

كان صوت نملة بتنصح باقي قرية النمل إللي هي عايشة معاهم وبتقول لهم:

كل النمل يجري على الجحور بسرعة، أحسن سليمان عليه السلام وجيشه يدوسوا علينا ويقتلونا وهمّ مش واخدين بالهم👌

"حَتَّى إِذَا أَتَوْا عَلَى وَادِي النَّمْلِ قَالَتْ نَمْلَةٌ يَا أَيُّهَا النَّمْلُ ادْخُلُوا مَسَاكِنَكُمْ لا يَحْطِمَنَّكُمْ سُلَيْمَانُ وَجُنُودُهُ وَهُمْ لا يَشْعُرُونَ"

 

☆احنا ممكن نشوف الجملة دي عادية جدا لكن الجملة دي فيها فوائد كتيرة وكنوز عظيمة 😊

منها:

إن إللي اتكلمت "نملة"... مجرد نملة عادية مالهاش أي وزن ولا أي مكانة وبالعافية متشافة أصلا، ومع ذلك نصحت باقي قرية النمل عشان مصلحتهم..

مقالتش مثلا طب وأنا مالي أنصحهم ليه؟

هو أنا يعني كلامي إللي هيأثر🙄

وأصلا لو نصحتُهم ماهمّ ممكن مايسمعوش كلامي عشان أنا مش معروفة ومجرد نملة بسيطة زي أي نملة😑

وكمان فيه نمل تاني غيري شايفين جنود سليمان، ماهمّ إللي يتكلموا إشمعنى أنا؟

مليش دعوة خليني ف حالي... وكمان فين دور الملكة والجنود؟

مش المفروض إنهم همّ إللي ياخدوا بالهم من المخاطر دي😕أنا أروح أستخبى وأنقذ نفسي وخلاص وهمّ أكيد هيتصرفوا😤

مقالتش أي حاجة من دي خالص.. هي مجرد ما شافت جيش سليمان عليه السلام جاي ناحيتهم، نصحت بكل قوتها وطاقتها وعملت إللي عليها👌

وحتى لو باقي النمل ماسمعش كلام النملة فعلى الأقل شالت اللوم والذنب من عليها،

يعني محدش هيقدر ييجي يقولها لو حصل لهم حاجة إنتِ محذرتيناش ليه؟

ولا هي هتلوم نفسها أو تندم وتقول ياريتني كنت نصحتهم😔

فمهما كانت معلوماتك بسيطة.. مهما كنت شايف نفسك حاجة صغيرة .. مهما شفت الناس مش هتسمع كلامك وإنك مهما قلت ونصحت مفيش فايدة لإنك شايف إن جهدك متواضع وبسيط مالوش وزن ومش متشاف:

اعمل إللي عليك دايما بدون تقصير، وانصح لله قدر وسعك وأجرك على الله بقدر طاقتك..  بيقول إيه؟

 

نرجع بقى للنملة ونشوف رد فعل سليمان عليه السلام على كلامها كان إيه،

لما سليمان عليه السلام سمع كلام النملة الضعيفة إللي يادوب باينة من الأرض تبسم ضاحكا من قولها، ابتسم وهو سعيد ولم يغضب من كلامها ومقالش مثلا:

 إزاي نملة تقول اسمي كده بدون أي ألقاب وأنا ملك الأرض😤

بالعكس، ده استشعر مدى عظمة النعمة إللي هو فيها، وحس بخضوع وخشوع وتواضع لجلال الله ورزقه وكرمه معاه وفضله،

ودعا ربنا إنه يلهمه حسن شكر النعم إللي أنعم بيها عليه وعلى أبويه، دي بالعمل الصالح والعبادات،

أنعم عليه بالملك...وأنعم عليه بإنه علمه لغة المخلوقات، فلو مكنش يعرف لغتهم مكنش فهم كلام النملة👌

 

"فَتَبَسَّمَ ضَاحِكًا مِّن قَوْلِهَا وَقَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ أَعْمَلَ صَالِحًا تَرْضَاهُ "

 

◇سليمان عليه السلام كان مَلِك شديد الثراء واسع المُلك أه،  لكنه كان متواضع لربه وخافض الجناح لخلقه، مش متكبر بنعم ربنا عليه،

ودي من أخلاق المؤمنين...إنهم ينسبوا كل فضل ونعمة لله ويلزموا شكره على النعم دي باللسان وباستعمالها في مرضاته عز وجل ،

وخدوا بالكم إللي بينسى شكر نِعم ربنا عليه في الدنيا ربنا بينساه في الآخرة👌

 

☆هو ربنا بينسى😳

كلمة النسيان لها معنيين:

معنى النسيان بتاعنا إللي هو إني ما افتكرش حاجة معينة: أنسى أصلي /أنسى إني صايم وأشرب/ أنسى إني اتوضيت/ وهكذا،

وطبعا ده من صفات النقص ، لا يتصف بها أبدا ربنا عز وجل👌

المعنى الثاني: وهو بمعنى التّرك... يعني إني أسيب الشيء ده ولا أبالي بشأنه،

يعني ربنا بيقول: "نَسُوا الله فَنَسِيَهم"

نسوا الله هنا معناها إن الناس تركوا العمل بأوامر ربنا، فيوم القيامة ربنا هيتركهم في النار👌

وربنا يوم القيامة هيقول للعبد:

 مش أنا زوِّجتك؟ مش أنا سخّرت لك الدواب والكون ده كله؟ ويعدّد نعمه على عبده ويسأله عن شكر النعم دي كلها ويحاسبه هل كان موقن إنه هيقابل ربنا للجزاء ولّا لأ،

فالعبد هيقول :

يارب نسيت، فربنا هيقول له : إحنا كمان هننساك... بمعنى "هنَتَنَاسَاك".. يعني زي ما انت تركت شكر النعم والطاعة وانت متعمد وعارف إنك راجع لربك في يوم من الأيام، ربك كمان هيتركك في النار👌

لأن لو العبد  هنا "ناسي" بمعنى  إنه مش فاكر، مكنش ربنا هيعاقبه، لإن الناسي مرفوع عنه الحساب والقلم لحد ما يتذكر، زي ما قال رسول الله ﷺ :

"رُفِعَ عن أُمَّتي الخطأ، والنسيان، وما استكرهوا عليه"

 

المهم يعني إن سليمان عليه السلام كان دائم الشكر لله مع الدعاء لنفسه ولأبويه؛

 

احنا عارفين من المرة إللي فاتت إن مُلك سليمان أعظم مُلك لحد قيام الساعة، وإن ربنا سخّر له الطير والجن،

ومن الحاجات إللي ربنا سخرها كمان لسليمان عليه السلام: "الريح"

وتسخير الريح لسليمان كان له قصة ،

وهي إن في يوم من الأيام ، كان سليمان عليه السلام بيستعرض خيول الصّافِنات، والصافنات دي هي أفضل أنواع الخيول ،

هي إللي بتقف على ٣ أرجل فقط، وعند الرجل الرابعة بتقف على طرفها، يعني بتقف على ثلاثة أرجل وطرف حافر😅

"إِذْ عُرِضَ عَلَيْهِ بِالْعَشِيِّ الصَّافِنَاتُ الْجِيَاد"

وسليمان عليه السلام كان بيحب الجهاد في سبيل الله جدا، عشان ينشر دين التوحيد لله رب العالمين في الأرض،

فكان بيستعمل الخيل دي في الجهاد،

ففي اليوم ده عرض جنوده الخيل دي عليه زي استعراض عسكري كده 🤔

فضل يتابعهم ويتفرج على جمالهم وهو منبهر ببديع صنع الله وجمال النعمة إللي بين إيديه من وقت الظهر لحد ما الشمس غابت، وهو مش واخد باله خالص من الوقت؛

لإن عرض الخيول واختبار مهاراتها وتدريبها بياخد وقت،

فلما غربت الشمس انتبه سليمان عليه السلام إنه عدى وقت الذكر بتاعه،

والذكر هنا ممكن يكون ذكر الله المعروف باللسان زي مثلا يعني أذكار المساء، أو الذكر بمعنى الصلاة يعني صلاة العصر، على خلاف في التفاسير...

زي مثلا لما بيكون عندك ضغط في الكلية أو امتحانات أو زيارة مهمة عندك في البيت هتم، واتلهيت فيهم لحد ما نسيت الصلاة أو الأذكار أو مشوار مهم حتى، أهه ده إللي حصل مع سليمان عليه السلام،

"فَقَالَ إِنِّي أَحْبَبْتُ حُبَّ الْخَيْرِ عَنْ ذِكْرِ رَبِّي حَتَّى تَوَارَتْ بِالْحِجَابِ"

ومع ذلك سليمان عليه السلام مقالش خلاص بقى، ماهو ربنا غفور رحيم وده كان غصب عني وما أخدتش بالي وراح عَدَّى الموضوع ببساطة كده زي ماحنا بنعمل للأسف في أوقات كثيرة، لأ...

ده قال لجنوده رجّعوا لي الخيل تاني، فلما رجّعوها نزل عليها بالسيف يضرب السيقان والأعناق لحد ما قتل الخيل كلهم🙊

"رُدوهَا عَلَيَّ فَطَفِقَ مَسْحًا بِالسُّوقِ وَالْأَعْنَاقِ"

 

☆طيب والخيل ذنبها إيه😳 مش هو إللي نسي😶

خلينا نقرب المعنى،

مثلا لما أنسى صلاة أو انام عن صلاة، مش أنا بشوف إيه السبب إللي خلاني أنسى أو السبب إللي خلاني أنام عن الصلاة دي؟

يعني لو واحد بيسهر على موبايله وبيضيع وقته وييجي ينام قبل الفجر بساعة وميصليش الفجر، ده المفروض يعمل إيه؟ المفروض يعاقب نفسه في الموبايل ده تاني يوم عشان يؤدب نفسه ويبطل سهر عشان يعرف يصحى لصلاة الفجر،

يعني مفروض يتخلص من الحاجة إللي بسببها وقع في المعصية..

وده إللي حصل مع سليمان عليه السلام، هو كان بيحب الخيل جدا، فحبه لها وطول متابعته ليها ولجمال وقفتها ورشاقتها ولياقتها خلاه ينسى ذكر الله سواء كانت صلاة العصر أو الذكر العادي زي ما قلنا،

فقام اتخلص منها، عشان يُؤدب نفسه ويعلمها إن المرة الجاية إللي هتنسى فيها حق الله عز وجل بسبب أمر دنيوي هي بتحبه، هيتخلص منه إرضاءًا لله عشان تتعلم متكررش الموضوع ده تاني معاه..

ولو تاخدوا بالكم لفظة القرآن

"فقطفق مسحًا بالسوقِ والأعناق"

وكأن سليمان عليه السلام بيضاعف تأديب نفسه بضرب مكان إعجابه بالصافنات، وإللي هو طريقة وقفتها الرشيقة ولياقتها، فمش مجرد قتل وقطع للعنق،

ده قطع للسيقان دي كمان إللي فتنته عن حق الله عز وجل، والله أعلم.

وطبعا أكيد كان متألم وهو بيقتلها، وكل ما كان الألم شديد على النفس كل ما كان الدرس إللي بنتعلمه راااسخ في القلب، فكل مرة هيشوف خيل هيفتكر حق الله في الذكر، وإنه ماينساش تاني😊

 

◇طيب برده ما هو سليمان قتل حيوان بريء ملوش ذنب🤨

ماهو أصلا قتل الحيوانات جائز وخصوصا إنها لو كانت حيوانات بتؤكل 😁

زي مثلا لو واحدة عندها طيور فوق السطح بتربيهم فانشغلت بيهم عن الصلاة، فراحت جابت الطيور دي كلها

وذبحتها وتصدقت بيهم عشان متشغلهاش تاني عن الصلاة عادي جدا💁‍♂️

فسليمان عليه السلام لما قتل الخيل استغلها برده، مش إنه قتلها ورماها هَدر كده،

 لأ، ده وزعها كإطعام، وكان في شريعتهم إن الخيل أكله مباح، وفي شريعتنا برده أكل الخيل مُباح عادي.

 

فلما سليمان عليه السلام ترك الخيل لله ربنا عوضه عنها بنعمة أعظم منها .. عوضه عز وجل بنعمة تسخير الريح، يعني سخّر له الريح تكون تحت أمره تنقله هو وجنوده من مكان لمكان، والريح طبعا أسرع من الخيل، ومن ترك شيئا لله عوضه خيرا منه 👌

"فَسَخَّرْنَا لَهُ الرِّيحَ تَجْرِي بِأَمْرِهِ رُخَاءً حَيْثُ أَصَابَ"

 

في يوم تاني كان سليمان عليه السلام بيتفقد الجيوش بتاعته، وكان عنده جيش من الإنس وجيش من الجن وجيش من الطير زي ما قلنا المرة إللي فاتت،

ففي يوم من الأيام بيتابع فيها جيوشه، لما وصل لجيش الطيور ملقاش الهدهد!

واستغرب هو راح فين المفروض يكون هنا في مكانه؟!

فقرر إنه هيعذبه عذاب شديد أو هيذبحه ، إلا لو كان الهدهد عنده سبب مقنع لغيابه عني كده بدون إذن👌

"وتَفَقَّدَ الطَّيْرَ فَقَالَ مَا لِيَ لا أَرَى الْهُدْهُدَ أَمْ كَانَ مِنَ الْغَائِبِينَ ۩  لأُعَذِّبَنَّهُ عَذَابًا شَدِيدًا أَوْ لَأَذْبَحَنَّهُ أَوْ لَيَأْتِيَنِّي بِسُلْطَانٍ مُّبِينٍ"

 

ليه الهدهد كان غايب عن باقي الجيش؟

 

 

اتكلمنا المرة إللي فاتت عن سليمان عليه السلام لما كان بيتفقّد الجيش بتاعه وملقاش طائر الهدهد موجود فتوعّد الهدهد إنه هيعذبه عذاب شديد لما يرجع👌

"وتَفَقَّدَ الطَّيْرَ فَقَالَ مَا لِيَ لا أَرَى الْهُدْهُدَ أَمْ كَانَ مِنَ الْغَائِبِينَ"

 

☆حد ممكن يسأل:

هو كده سليمان عليه السلام مش قاسي شوية مع الحيوانات😕

سليمان عليه السلام نبي وفي نفس الوقت مَلِك، يعني بإيده الأمر والنهي حتى على الحيوانات وبيعمل إللي بيشوفه مناسب كقائد للشعب والجيوش،

والهدهد جندي من جنود سليمان في جيش الطيور، فإزاي الجندي يغيب عن قائده من غير استئذان🤷‍♂️

لكن سليمان عليه السلام كان عادل، فقال إن الهدهد لو جاب سبب مقنع خلاه يغيب عن الجيش هسامحه،

"لَأُعَذِّبَنَّهُ عَذَابًا شَدِيدًا أَوْ لَأَذْبَحَنَّهُ أَوْ لَيَأْتِيَنِّي بِسُلْطَانٍ مُّبِينٍ"

 

يعني سليمان عليه السلام مقالش إنه هيعذبه لغرض التعذيب ، لأ.. بمجرد إن يبقى في عذر مقبول، يبقى خلاص مفيش عقوبة👌

بعد فترة بسيطة إلّا وسواد نازل من السماء وداخل على سليمان وسط الجنود من الجن والإنس والطيور والكل مُترقب يا ترى هيحصل إيه للهدهد 🙊

فتكلم الهدهد وقال لسليمان عليه السلام:

أنا عرفت معلومات انت متعرفهاش وجايبلكم أخبار غريبة ومافيشهاش أي شك أو إشاعات،

مع إني هدهد صغير ضعيف، وإنت نبي وملك وعندك كل الجنود دي فأنا عندي معلومات خَفِيَت عنك👌

"فَمَكَثَ غَيْرَ بَعِيدٍ فَقَالَ أَحَطتُ بِمَا لَمْ تُحِطْ بِهِ وَجِئْتُكَ مِن سَبَإٍ بِنَبَإٍ يَقِينٍ"

أنا كنت في مملكة سبأ، وهناك لقيت الحاكم إللي بيحكم المملكة امرأة مش رجل، وهي غنية جدا وعندها من أسباب القوة والمُلك، وكرسي العرش بتاعها عظيم جدا،

"إِنِّي وَجَدتُّ امْرَأَةً تَمْلِكُهُمْ وَأُوتِيَتْ مِن كُلِّ شَيْءٍ وَلَهَا عَرْشٌ عَظِيمٌ"

 

☆ طيب ياهدهد انت مالك يعني تحكمهم امرأة ولّا رجل هتفرق إيه🤨

الهدهد استنكر وجود امرأة في الحكم لأن ده مش مكان النساء،

ربنا خلق المرأة بطبيعة وتكوين مختلف عن الرجل عشان هي لها دور في الحياة مختلف عن دور الرجل،

المرأة رقيقة وعاطفية وحنونة ومشاعرها دي بتغلب عليها أكتر من عقلها،

عشان هو ده إللي هتحتاجه لما تيجي تقوم بدورها وهو تربية أبنائها ومراعاتهم ومراعاة تقلّباتهم في كل مراحل حياتهم وحُسن احتواءهم في المراحل دي كلها،

ودي حاجة معروفة من قديم الزمان ومسمعناش من أول آدم عليه السلام إن فيه امرأة حكمت بلد فيه رجال قبل ملكة سبأ،

وكذلك النبوة مبتكونش غير في الرجال، لإن كل دي مهام بتحتاج قوة في البدن وقوة تحمل للصعاب وتغليب للعقل على العواطف واجتماع بباقي الرجال وقيادة الجيوش وطلب الرزق في الحر والبر،

إلى آخر الأمور إللي ربنا خلق الرجل بطبيعته دي عشان يكون مُهيأ ليها أكتر من المرأة،

وحتى في شريعة الإسلام، المرأة لا يجوز إنها تتولى الرئاسة أو القضاء👌

فطبيعي إن الهدهد يستغرب من الموضوع🤷‍♂️

 

فالهدهد شاف عند مملكة سبأ فساد في إدارة الحكم.. وشاف فساد تاني أخطر منه 😳

قال الهدهد وهو متضايق وقلبه متقطع:

أنا لقيتهم بيسجدوا للشمس من دون الله😱

"وَجَدتُّهَا وَقَوْمَهَا يَسْجُدُونَ لِلشَّمْسِ مِن دُونِ اللَّهِ وَزَيَّنَ لَهُمُ الشَّيْطَانُ أَعْمَالَهُمْ فَصَدَّهُمْ عَنِ السَّبِيلِ فَهُمْ لا يَهْتَدُونَ"

 

☆طيب يا هدهد إنت إيه مشكلتك يعني يسجدوا للشمس ولّا القمر🤨

حد أنزل عليك كتاب وقال لك دافع عن الدين؟

هل ربنا أرسلك كرسول وقال لك ادعوا لله ؟

طب حد وصّاك وقال لك اعمل الخير وليك حسنات؟

لأ...طيب إيه مشكلتك يعني ،ما يعبدوا إللي يعبدوه وخلاص😕

بس الهدد كان بيفكر:

إزاي ناس ربنا خلقهم ويعبدوا غيره😳

إزاي يبكوا ويتضرعوا لغير الله😶

 

☆أيوة ماشي يا هدهد انت علاقتك إيه بالموضوع برده؟

ربنا عمل لك إيه مخليك تتضايق كده عشانه..دي حاجة لا تخصك أصلا😕

 

قال الهدهد :

"ألاَّ يَسْجُدُوا لِلَّهِ الَّذِي يُخْرِجُ الْخَبْءَ فِي السَّمَاوَاتِ وَالأَرْضِ وَيَعْلَمُ مَا تُخْفُونَ وَمَا تُعْلِنُونَ"

يعني  كأن لسان حال الهدهد بيقول:

ده ربنا يا بشر 😳

ربنا إللي خلق السحاب وأنزل منه الأمطار المستخبية فيها وشق الأرض وأخرج منها النباتات المستخبية جوة الحبوب تحت الأرض بعيد عنا..

كل ده أخرجه لنا من المخابيء عشان ناكل ونشرب ونشبع ونعيش في أمانه ورزقه الواسع،

بقى معقول ييجي بعد كده حد يعبد حد تاني غيره ؟!

إزاي ما أدافعش عن حق الله في الألوهية😳

أنا مأقدرش أشوف إلهي وَلِيّ نعمتي ومدبر أمري وأمر كل الخلائق يُكفَر بِيه ويُنتَقص من حقه وقدره وجلاله وأسكت😤

☆الهدهد كان عنده حمِية للتوحيد وغَيرَة على جناب الله وحقه في العبودية لإنه خالق كل شيء،

فِطرته ومروءته الحية دي خلّوه يرفض الوضع السيء ده ويبلغ سليمان عليه السلام لأنه نبي ومسؤول عن تعبيد الأرض لله عز وجل،

"الله لا إله إلا هو رب العرش العظيمَ"

 

مملكة سبأ يا جماعة كانت آية في الجمال، فيها الأشجار والأنهار والثمار، فالهدهد كان في مكان خليه ينسى كل شيء، يعني  بالنسبة لطائر هيحتاج إيه أكثر من كده🤷‍♂️

"لَقَدْ كَانَ لِسَبَإٍ فِي مَسْكَنِهِمْ آيَةٌ ۖ جَنَّتَانِ عَن يَمِينٍ وَشِمَالٍ"

 

فالهدهد برغم المُغريات دي كلها أول ما شاف ربنا بيُعصَى ويُكفَر بيه، نسي كل شيء ورجع لسليمان عليه السلام وقال له أنا ما لفتش نظري هناك إلا فساد عظيم بالمواصفات الفلانية، ولازم نتصرف عشان نغير ده👌

 

شوفوا الهدهد إللي ماعندهوش صحيفة يتكتب فيها الحسنات والسيئات ربنا كافؤه بإيه بسبب موقفه ده:

◇أولا :

ربنا مدحه في القرآن، بإنه طائر إيجابي وعنده همة وغيرة على التوحيد.

◇ثانيا:

ربنا ضربه مثل لرسول الله ﷺ في الدعوة ولكل مَن يقرأ القرآن إلى قيام الساعة.. إزاي؟

يعني شوفوا الهدهد عشان حبتين ربنا بيرزقه بيهم كل يوم، حس أد إيه إن ربنا عظيم ويستحق العبودية الخالصة،

فراح دعا إلى عبودية الله وجاب أمة كاملة عشان يُسلِموا لله،

فانتم ياللي عندكم كل شيء هتعملوا إيه؟!

 

◇ثالثا:

نهى رسول الله ﷺ عن قتل الهدهد،

يعني هو كان هدهد واحد بس إللي عمل كده، لكن ربنا حَمى الفصيلة كلها بسبب إيجابيته وهمته العالية في الغَيرة على دين الله👌

☆مش بيفكركم بقصة "وكان أبوهما صالحا" إللي قلناها في قصة الخِضر 😁

وعلى فكرة لما الهدهد عمل كده مكانش مستني الجزاء ده ولا كان طمعان في أي حاجة في المقابل،

هو بس كان مُمْتن لله وغيور على جنابه بسبب حبتين القمح إللي بياكلهم في يومه 😊

سليمان عليه السلام لما سمع كلام الهدهد رد قال إيه؟

قال:

هنشوف انت صادق فعلا ولاّ بتكذب وبتقول القصة دي عشان تهرب من العقاب👌

"قالَ سَنَنظُرُ أَصَدَقْتَ أَمْ كُنتَ مِنَ الْكَاذِبِينَ

 وهنا فيه فايدة :

إن لما حد يقول لك معلومة إنت متعرفهاش، مهما كنت شايف نفسك متعلم ودارس وعارف، والشخص إللي بيقولك المعلومة في وجهة نظرك مالوش أي وزن علمي،

ماتقولش أنا عمري ما سمعت الكلام ده والكلام ده غلط، وتبدأ تجادل من غير حتى ما تكلف نفسك تدوّر هل كلامه صح ولّا لأ🤷‍♂️

ويُذكر إن واحد من التابعين العلماء سمع عن مسألة شرعية معينة، فقال باستنكار: أنا أول مرة أسمع الكلام ده🤨

فصاحبه قال له: إنت جمعت العلم كله🤔

فالتابعي قال : لأ😕

فصاحبه قال له: فهل جمعت نصفه؟ قال : لأ..

فقال له: خلاص! اعتبر المعلومة دي في النصف اللي انت متعرفوش💁‍♂️

 

قال سليمان عليه السلام للهدهد خد رسالتي ووصلها لهم وهنشوف رد فعلهم إيه👌

لأن الهدهد هو إللي جاب الخبر فطبيعي إن هو إللي يوصل رسالة سليمان عليه السلام لملكة سبأ،

اذْهَب بِّكِتَابِي هَذَا فَأَلْقِهْ إِلَيْهِمْ ثُمَّ تَوَلَّ عَنْهُمْ فَانظُرْ مَاذَا يَرْجِعُونَ"

فأخد الهدهد رسالة سليمان وسافر من فلسطين لمملكة سبأ في اليمن وألقى رسالة سليمان لملكة سبأ وطار بعيد وقعد يراقب،

الملكة فتحت وقرأت.. وأمرت باجتماع الوزراء والأعيان عشان تقول لهم عن رسالة سليمان عليه السلام،

اجتمع الملأ، وقالت لهم:

يا جماعة أنا وقع قدامي رسالة، ولما فتحتها لاقيتها من سليمان الملك المعروف، كاتب فيها: بسم الله الرحمن الرحيم ...أدعوكم للإسلام لله رب العالمين، فأسلموا لله وتعالوا منقادين مستسلمين له عز وجل تاركين عبادة الشمس وكل ما أنتم عليه من شرك ومعاصي.

"قالَتْ يَا أَيُّهَا الْمَلَأُ إِنِّي أُلْقِيَ إِلَيَّ كِتَابٌ كَرِيمٌ إِنَّهُ مِن سُلَيْمَانَ وَإِنَّهُ بِسْمِ اللَّهِ الرَّحْمَنِ الرَّحِيمِ ألاَّ تَعْلُوا عَلَيَّ وَأْتُونِي مُسْلِمِينَ"

 

فقالت لهم إيه رأيكم في الموضوع🤔

أنا مش هاخد أي قرار غير لما تقولوا رأيكم،

"قَالَتْ يَا أَيُّهَا الْمَلَأُ أَفْتُونِي فِي أَمْرِي مَا كُنتُ قَاطِعَةً أَمْرًا حَتَّىٰ تَشْهَدُونِ"

فقالوا لها:

احنا أقوياء وعندنا قوة تحمل وهنقدر نقاتل لو عايزة تعلني الحرب.. ولو عايزة السلام معاه وعدم الدخول في حرب فبراحتك برده...

شوفي إللي انتِ عايزاه وإحنا تحت أمرك💁‍♂️

"قَالُوا نَحْنُ أُوْلُوا قُوَّةٍ وَأُوْلُوا بَأْسٍ شَدِيدٍ وَالأَمْرُ إِلَيْكِ فَانظُرِي مَاذَا تَأْمُرِينَ"

 فقالت لهم:

بصراحة كده الملوك لما بيدخلوا بلد بيخربوها بالحرب وبيذلّوا حكامها وأشرافها وسادتها،

فخلينا نبعتله هدية كده ونشوف هل هو من طُلّاب الدنيا وبيرضيه عطاياها فخلاص تبقى اتحلت ونعمل معاه معاهدة سلام دائم مقابل المال والعطايا،

ولّا هو مش هتلزمه هديتنا في شيء ومصمم عل طلبه إنه مش عايز مننا غير الإسلام زي ما بيقول فعلا👌

"قَالَتْ إِنَّ الْمُلُوكَ إِذَا دَخَلُوا قَرْيَةً أَفْسَدُوهَا وَجَعَلُوا أَعِزَّةَ أَهْلِهَا أَذِلَّةً ۖ وَكَذَٰلِكَ يَفْعَلُونَ ۩ وَإِنِّي مُرْسِلَةٌ إِلَيْهِم بِهَدِيَّةٍ فَنَاظِرَةٌ بِمَ يَرْجِعُ الْمُرْسَلُونَ"

 

طار الهدهد وسبق الرّسل ورجع لسليمان وحكى له إللي شافه هناك وسمعه وهحيصل،

فلما جاء الناس من طرف الملكة ومعاهم الرسول إللي هيوصل الهدية لسليمان عليه السلام ودخلوا عليه، اتصدموا من المنظر!!

جنود من الجن والإنس والطير... مَلأ مالوش مثيل ومُلك مفيش في عظمته على وجه الأرض😮

فقدموا الهدايا لسليمان عليه السلام وهمّ مفي قدامهم إلا إنهم ينفّذوا أوامر الملكة بكده،

فغضب سليمان جدا لإنهم أساسا تخيلوا إنه من طُلّاب الدنيا، وإن أموالهم ممكن تُغريه وتفتنه عن نشر دين الله، وإنهم استهانوا بكلامه فقال لهم:

أنا مش عايز أموالكم .. ربنا أعطاني أحسن وأعظم من إللي أعطاكم بكثير ..إنتوا إللي تفرحوا لما حد يعطيكم أموال وهدايا، لكن أنا لأ😤

"فَلَمَّا جَاءَ سُلَيْمَانَ قَالَ أَتُمِدُّونَنِ بِمَالٍ فَمَا آتَانِيَ اللَّهُ خَيْرٌ مِّمَّا آتَاكُم بَلْ أَنتُم بِهَدِيَّتِكُمْ تَفْرَحُونَ "

 

وقال للرسول بلهجة تهديد قوية:

ارجع لقومك تاني بالهدايا دي، احنا هنجيلهم بجنود مش هيقدروا عليها وهنخرجهم من سبأ أذلة متهانين لو همّ مجوش مُنقادين مستسلمين لدين رب العالمين 👌

"ارْجِعْ إِلَيْهِمْ فَلَنَأْتِيَنَّهُمْ بِجُنُودٍ لّا قِبَلَ لَهُم بِهَا وَلَنُخْرِجَنَّهُم مِّنْهَا أَذِلَّةً وَهُمْ صَاغِرُونَ"

 

يا ترى بقى ملكة سبأ هتقاتل سليمان عليه السلام ، ولّا هتستسلم له؟

 

 

كنا واقفين المرة إللي فاتت عند سليمان عليه السلام لما قال لرُسل ملكة سبأ إنه هيأتيهم بجنود مش هيقدروا عليها وهيخرجوهم من أرضهم مذلولين،

لما الرسل مشيوا بقى من عند سليمان عليه السلام ووصلوا لملكة سبأ -ويُقال إن اسمها بَلقِيس- حكوا لها إللي شافوه عند سليمان عليه السلام،

فقالت أنا كنت متأكدة إنه مش هيكون زي ملوك الدنيا، واحنا مش هنقدر على قتاله فعلا ..

فقررت إنها تروح مع وفد من كبراء قومها عشان تسمع من سليمان عليه السلام عن الدين إللي هو بيدعو إليه ده،

 

سليمان عِرف إن الملكة هتيجي مع وفد لسليمان، سواء بقى عرف عن طريق الوحي أو عن طريق الهدهد أو هو نفسه استنتج كده، المهم إنه عرف وخلاص،

فعرض مهمة على أفراد الملأ بتاعه قال لهم:

مين فيكم يقدر يجيبلي العرش بتاعها قبل ما ييجوا عندنا هنا برغبتهم طائعين مستسلمين؟

"قَالَ يَا أَيُّهَا الْمَلَأُ أَيُّكُمْ يَأْتِينِي بِعَرْشِهَا قَبْلَ أَن يَأْتُونِي مُسْلِمِينَ"

 

غرض سليمان من طلبه ده إنه يورّيها جزء من قدرة ربنا وفضله عليه ونعمه العظيمة إللي وهبها له عز وجل 👌

فعفريت من الجن من جنود سليمان من جيش الجن قال بافتخار واقتدار وهمة عالية:

أنا هجيبهولك قبل ما تقوم من مقامك، يعني قبل ما تقوم من مجلسك ده وتتركه، أو قبل ما مجلسك يكون انفض باللي فيه وكل واحد يروح لحاله،

المعنى بالظبط على خلاف بين المفسرين لكن المقصود يقول هجيبهولك بسرعة جدا،

وأنا قوي هقدر أشيله، وأمين مش هضيع منه حاجة👌

"قَالَ عِفْريتٌ مِّنَ الْجِنِّ أَنَا آتِيكَ بِهِ قَبْلَ أَن تَقُومَ مِن مَّقَامِكَ وَإِنِّي عَلَيْهِ لَقَوِيٌّ أَمِينٌ"

 

☆ملحوظة:

العفريت هو المارد من الجن شديد القوة والدهاء والمكر والخُبث،

والعفريت من الجن ده أعلى في الخبث والدهاء والمكر من مَردة الجن، والمَردة أشد من الشياطين،

فباختصار:

الجن عموما كلهم كفار ما عدا فصيلة الجن المؤمن:

 "وَأَنَّا مِنَّا الْمُسْلِمُونَ وَمِنَّا الْقَاسِطُونَ فَمَنْ أَسْلَمَ فَأُولَئِكَ تَحَرَّوْا رَشَدًا ۩ وَأَمَّا الْقَاسِطُونَ فَكَانُوا لِجَهَنَّمَ حَطَبًا "

 

لكن واحد تاني رد وقال :

أنا أجيبهولك في غمضة عين 👌

ربنا قال عنه:

"قَالَ الَّذِي عِندَهُ عِلْمٌ مِّنَ الْكِتَابِ أَنَا آتِيكَ بِهِ قَبْلَ أَن يَرْتَدَّ إِلَيْكَ طَرْفُكَ"

 إللي عنده علم من الكتاب هو:

 إما جبريل عليه السلام، أو هو صاحب صالح لسليمان عليه السلام عنده اسم الله الأعظم الذي إذا دُعِيَ به أجاب.

 

☆طب بما إنه مش جن وعنده قوة خارقة، هيجيب العرش في لمح البصر إزاي🤔

بالدعاء.. هيدعو الله باسمه الأعظم وهو موقن بالإجابة ويعلم إن الاسم ده إذا دُعِي الله به أجاب،

عشان كده ربنا وصفه بإنه عنده علم؛ لإن علم أسماء الله وصفاته من أعظم علوم التوحيد👌

فمجرد ما هيدعو هيلاقيه قصاده، وفعلا ده إللي حصل👌

 

في لمح البصر أو أسرع كمان بمجرد ما دعا باسم الله الأعظم سليمان عليه السلام لقى العرش قدامه!

فلما سليمان شاف عرش بلقيس قصاده أول حاجة عملها

كانت شكر النعمة👌

وكأنه بيقول:

مش هسمح للنعمة تلهيني عن ذكر الله وشكره،

مش هسمح للنعمة تفتني عن ديني،

أنا عارف إن النعم دي اختبار يا إما أشكر يا إما أجحد النعمة وأكفر، ولازم كل مرة أنجح في الاختبار ده،

وإللي بيشكر بيشكر لنفسه لإن ربنا كده كده غني عن العاملين،

وعبودية الشكر دي لمصلحتنا احنا لإن ربنا هيزيد الشاكر من فضله، واللي مش بيشكر النعمة مش هيضر ربنا بشيء..مش بيضر إلا نفسه👌

"فَلَمَّا رَآهُ مُسْتَقِرًّا عِندَهُ قَالَ هَذَا مِن فَضْلِ رَبِّي لِيَبْلُوَنِي أَأَشْكُرُ أَمْ أَكْفُرُ وَمَن شَكَرَ فَإِنَّمَا يَشْكُرُ لِنَفْسِهِ وَمَن كَفَرَ فَإِنَّ رَبِّي غَنِيٌّ كَرِيمٌ"

 

بعد كده وجّه سليمان أوامر للخدم بتوعه وقال لهم:

غيّروا في شكل العرش بتاعها شوية بحيث لما تيجي نخليها تشوفه ونشوف رد فعلها 👌

"قَالَ نَكِّرُوا لَهَا عَرْشَهَا نَنظُرْ أَتَهْتَدِي أَمْ تَكُونُ مِنَ الَّذِينَ لَا يَهْتَدُونَ"

والتغيير إللي حصل هنا يا جماعة كان تغيير في الشكل يعني يضيف جواهر مثلا بطريقة معينة، لكن مش تغيير في أصل العرش؛ لأنه مش بتاعه عشان يتصرف فيه👌

 

☆طيب ليه سليمان أمر جنوده اصلا إنهم يغيروا التغيير ده🤔

إحنا عارفين إن سليمان عليه السلام ذكي وسريع البديهة،

من يوم ما كان بيحكم مع سيدنا داود في الخصومات،

فهو حب يعرف هل عندها وعي وبصيرة وهتقدر تتعرف علي عرشها رغم التغييرات إللي عملوها فيه دي،

ولّا هتكون من النوع إللي بيدخل عليه الخدع والتزييف وبيتلخبط ومش بيعرف يميز الحق من الباطل👌

 

فلما جاءت ملكة سبأ لسليمان استقبلها وورّاها العرش وسألها:

ده العرش بتاعك👈

فقالت:  كأنه هو😳

هي مقدرتش تقول 《لأ》 لأنه يشبه العرش بتاعها جدا، وفي نفس الوقت مش قادرة تقول《أيوة》 لأن العرش بتاعها في سبأ، والمسافة بين فلسطين وبين سبأ كبيرة...فإزاي العرش بتاعها يبقى موجود هنا😕

" فَلَمَّا جَاءَتْ قِيلَ أَهَكَذَا عَرْشُكِ قَالَتْ كَأَنَّهُ هُوَ "

 

☆فهي كانت امرأة صادقة في بحثها عن الحق؛ لأنها لو قالت لأ مش عرشي وعرشي أحسن 😤

كان هيظهر إنها مخادعة وعايزة تخدع سليمان عليه السلام  وتتظاهر إنها تابعة له عشان تحافظ على ملكها،

ولو كانت قالت لأ ده مش عرشي، يبقى هي أنكرت بدون بيّنة، وكل ده هيبين شخصيتها قصاد سليمان عشان يعرف يتعامل معاها إزاي😈

فكلامها كان دقيق قالت : كأنه هو 🤔

فالعلماء قالوا لعل ربنا وفّقها للهداية بسبب صدقها ده👌

سليمان عليه السلام كان أمر الجن إنهم يبنوا قصر عظيم من الزجاج ، وأمَر إن تحت القصر الزجاجي يكون في مية بتجري  بغزارة،

وكان سليمان عليه السلام قاعد في القصر ده ومعاه خدمه من الجن والإنس والطير مستني الملكة تدخل عليهم، وبالفعل الخدم وصلوها عند القصر..

"قِيلَ لَهَا ادْخُلِي الصَّرْحَ فَلَمَّا رَأَتْهُ حَسِبَتْهُ لُجَّةً وَكَشَفَتْ عَن سَاقَيْهَا"

يعني لما وصلت ، بصت كده، وتخيلت إنها لازم هتمشي في المية عشان تدخل، فرفعت ملابسها الساترة الطويلة الملامسة للأرض وكشفت عن الساقين بتوعها عشان تعدي لجوة من غير ما تبل هدومها،

☆واخدين بالكم يابنات 🙂

امرأة كافرة وهدومها كانت واصلة للأرض👌

 

المهم،

سليمان نبهها إن دي مش مية، ده قصر معمول من الزجاج النقي جدا، والمية تحت منه👌

"قَالَ إِنَّهُ صَرْحٌ مُّمَرَّدٌ مِّن قَوَارِيرَ"

وكان غرض سليمان عليه السلام من بناء القصر ده إنه يخليها تشوف مُلك هو أعظم من ملكها وبالتالي مفيش حاجة ممكن تُصرفه عن نشر دين الله،

وكمان عشان ميكونش عندها شك في قدرة ربنا بعد كده وعطاؤه وفضله لعباده الموحدين،

مش بقى عشان إنه يشوف رجلها فيها شعر ولّا لأ زي ما الإسرائيليات افترت عليه والعياذ بالله من سوء أدبهم وفحش لسانهم مع أنبياء الله 😑

بعد ما بلقيس شافت كل ده قالت:

"رَبِّ إِنِّي ظَلَمْتُ نَفْسِي وَأَسْلَمْتُ مَعَ سُلَيْمَانَ لِلَّهِ رَبِّ الْعَالَمِينَ"

أسلمت بلقيس مع سليمان لله وحَسُن إسلامها،

 

مفيش بقى أي دليل على إن سليمان عليه السلام تزوجها أو لأ، ومفيش دليل برده إن أم بلقيس كانت من الجن،

وإن الجن مكنوش عايزين سليمان يتزوجها😅

كل الكلام ده مفيش عليه أي دليل صحيح ولا يضرنا الجهل به👌

 

☆عندنا بقى ملحوظة مهمة نختم بيها قصة سليمان مع ملكة سبأ😊

احنا طبعا شوفنا حكمة بلقيس ملكة سبأ، وشوفنا إزاي الوزراء كانوا متسرعين وهي كانت أحكم منهم،

وربنا أقر حكمتها لما قالت:

"إن الملوك إذا دخلوا قرية أفسدوها وجعلوا أعزة أهلها أذلة" فقال: "وكذلك يفعلون"

يعني ربنا بيقول إن كلام ملكة سبأ فعلا صحيح وده حال ملوك الدنيا،، فكون القرآن يُقر معلومة على لسان ملكة فده تشريف للملكة دي إنها مش واحدة عادية👌

وده بيدل على حكمتها وعلى فقه الواقع عندها ومعرفتها بعواقب الأمور،

وإلا اشمعنى يعني هي عارفة الملوك بيعملوا إيه والوزراء اللي معاها مايعرفوش🤨

فواضح إن هي نفسها كامرأة لها عقلية مختلفة عن باقي النساء مكّنتها من سياسة الشعب وحكمه في الفترة دي بحكمة و رُشد،

وحتى العلماء كمان أثنوا على إنها اتصرفت بحكمة ووازنت بين المصالح والمفاسد وطلعت بحل يخليها تتبين هل سليمان فعلا من ملوك الأرض إللي بيفسدوا؟ ولّا هو نبي وعايز الدين ومصلحة العباد؟

لكن يا جماعة برغم كل ده ومهما كانت بلقيس حكيمة وأفضل من رجال كتير فهي حالة شاذة وماينفعش نقيس على الشاذ👌

لإن القواعد مش بتتبني على الاستثناءات...

فمش معنى إن الملأ الرجال هنا كانوا متسرعين وأخدتهم الحمية والتسرع للحرب والصدام، إن ده عادة الرجال كلهم على طول الخط، لأ، لكل قاعدة شواذها،

ولو راجعنا التاريخ هنلاقي أمثلة كتييير جدا على حكمة الحكام والوزراء الرجال،

بعكس أمثلة قليلة جدا للنساء،

فهي حكمتها ورُشدها في القصة كلها واضحين وواضح إنها مختلفة عن باقي إللي حواليها،

لكن اختلافها المميز ده ما يخليناش نعتبرها قاعدة بقى والناس تقيس عليها ويقعدوا يطالبوا بتولية النساء لأمور الحكم والخلافة😅

كل واحد له دوره زي ما قلنا في مثال الجندي والضابط المرة إللي فاتت👌

 

ياترى بقى إيه إللي حصل مع سليمان بعد كده،

 

اتكلمنا المرة إللي فاتت عن قصة سليمان مع ملكة سبأ، وشوفنا إن سليمان عليه السلام كان بينشر دين ربنا في الأرض،

واستمر الحال ده مع سليمان عليه السلام فترة من الزمن، وكان عنده جيش من الجن زي ما قلنا قبل كده،

فاكرين لما قلنا إن ثاني مسجد بُني في الأرض كان المسجد الأقصى وإللي بناه كان يعقوب عليه السلام🤔

خلال السنين دي كان المسجد اتخرّب، فداود عليه السلام كان بدأ يجدده، لكنه مات قبل ما يكمّل تجديده،

فأوصى سليمان عليه السلام إنه يكمل من بعده تجديده وترميمه،

فأمر سليمان عليه السلام الجن بإنهم يتولوا مهمة البناء والترميم دي،

وكان عليه السلام بيُشرف عليهم بنفسه، فربنا كان مسخّر الجن لخدمة سليمان عليه السلام ، سواء المؤمن منهم أو الكافر،

"وَمِنَ الْجِنِّ مَن يَعْمَلُ بَيْنَ يَدَيْهِ بِإِذْنِ رَبِّهِ ۖ وَمَن يَزِغْ مِنْهُمْ عَنْ أَمْرِنَا نُذِقْهُ مِنْ عَذَابِ السَّعِيرِ"

كان مجموعة منهم بيبنوا له القصور والتماثيل وأحواض كبيرة يُجمع فيها الماء،

ومجموعة تانية كانوا بيغوصوا في البحار يستخرجوا له منها الجواهر واللآلئ،

"يَعْمَلُونَ لَهُ مَا يَشَاءُ مِن مَّحَارِيبَ وَتَمَاثِيلَ وَجِفَانٍ كَالْجَوَابِ وَقُدُورٍ رَّاسِيَاتٍ"

وبيعملوا كمان أعمال مختلفة، و مكنش حد يقدر يخرج عن أمر سليمان عليه السلام،

"وَمِنَ الشَّيَاطِينِ مَن يَغُوصُونَ لَهُ وَيَعْمَلُونَ عَمَلًا دُونَ ذَٰلِكَ وَكُنَّا لَهُمْ حَافِظِينَ"

و أي واحد من الجن يعصي أمر سليمان عليه السلام، كان بيتم ربطه بالأغلال والسلاسل أو ربنا بيعذبه بالنار.

الشياطين كانوا بيقولوا للناس في زمن سليمان عليه السلام إنهم كانوا بيعلموا الغيب،

وكانت الناس مصدقاهم لأنهم كانوا بيشوفوا قوة الجن وقدرتهم الخارقة،

وكان سليمان بيقول لهم إن ده مش صح، فلا يعلم الغيب إلا الله، لكن الناس مكنوش مقتنعين،

فسليمان عليه السلام دعا ربنا إنه يُخفِي عن الجن موته عشان يثبت للناس إن الجن كدابين في زعمهم العلم بالغيب..

كان سليمان عليه السلام كل فترة بيختلي بنفسه عشان يتعبّد لله ومبيسمحش لحد إنه يقطع عليه خلوته الإيمانية دي،

وكان بياخد معاه إللي بيحتاجه من الأكل والشرب،

زي ما رسول الله ﷺ كان بيخرج يتعبد في غار حراء قبل البعثة😁

فسليمان عليه السلام عرف إنه هيموت قريب؛ لأن الأنبياء زي ماقلنا قبل كده بيتم تخييرهم قبل ما يموتوا بين الموت وبين المُكْث في الدنيا 😊

ففي يوم كان سليمان عليه السلام بيتابع شغل الجن في ترميم المسجد الأقصى وبيشرف عليهم بنفسه عشان مايكسلوش عن الشغل👌

 

☆إيه ده، يعني المسجد الأقصى هو هيكل سليمان إللي اليهود بيقولوا عليه🤨

لأ طبعا،

موضوع هيكل سليمان ده أصلا حاجة من اختراع اليهود مش موجودة 🙄

يعني المسجد حاجة والهيكل ده حاجة تانية،

والدليل على كده إن رسول الله ﷺ  قال عن سليمان عليه السلام إنه بنى بيت المقدس، إللي هو المسجد الأقصى زي ما قلنا من شوية👌

ومعنى البناء هنا يعني هو إللي أعاد بناء المسجد الأقصى، يعني هو كان موجود ولكنه أعاد بناؤه،

ده غير إن في كتب اليهود في اختلاف بين علماء اليهود على مكان الهيكل وعلى شكل الهيكل نفسه عامل إزاي😶

يعني متخيلين ناس بتدور على حاجة مش عارفين هي إيه أصلا🤦‍♂️

 

◇طب ثواني كده، يعني إيه أصلا هيكل سليمان🤨

الهيكل يعني المعبد، وفي اللغة العِبرية الهيكل معناه بيت الإله، واليهود بيقولوا إن الهيكل ده هو أهم مكان للعبادة، وإن سليمان بناه لهم ولديانتهم،

وبيقولوا إنه موجود تحت المسجد الأقصى، عشان كده بيحفروا تحته دلوقتي عشان عايزين يوقعوه😑

 

المهم،

سليمان عليه السلام كان واقف وساند دقنه على العصاية بتاعته بيراقب سير العمل وهمّ شايفينه باصص عليهم طول الوقت،

و هو في الوضع ده ربنا قبض روحه 🙊

الجن شايفينه مفتح 👀 وباصص عليهم...لكن هو في الحقيقة ميت😅

واستمر الوضع كده فترة زمنية.. أد إيه بالضبط؟ محدش يعرف، في علماء قالوا أسبوع .. علماء تانيين قالوا شهر.. علماء غيرهم قالوا سنة😶

العلم عند الله والموضوع مش هيفيدنا كثير، أهم حاجة نعرف إنه قعد فترة ميّت على الأقل أسبوع،

والجن مكنتش تعرف وعمالين يشتغلوا بدون راحة، ومحدش كان يقدر يقرب من سليمان عليه السلام،

وطبعا همّ لم يشكّوا إن سليمان عليه السلام كان ميت، مع إنه مكنش بياكل ولا بيشرب؛ لأنهم عارفين الأنبياء وضعهم مختلف،

يعني ممكن ربنا بيعطيهم القدرة في أوقات معينة إنهم يستغنوا عن الأكل والشرب،

زي موسى عليه السلام لما صام ثلاثين يوم وأفطر وبعدها صام عشر أيام تانية بأمر من ربنا ومكنش بياكل ولا يشرب،

وخدوا بالكم إن أجساد الأنبياء لا تتحلل ولا تأكلها دواب الارض، يعني أجساد كوووول الأنبياء والرسل زي ماهي في القبور لم تتعفن ولم تتحلل👌

فربنا أرسل دودة الأرض تأكل عصا سليمان عليه السلام إللي هو كان ساند عليها، 

فربنا أرسل دودة الأرض واسمها 《الأَرَضَة》 وقعدت تأكل عصا سليمان عليه السلام إللي هو كان ساند عليها بدقنه،

فقعدت تاكل فيها من تحت لحد ما العصا ضعفت وبقت هشة فوقعت، وسقط سليمان عليه السلام على الأرض..

"فَلَمَّا قَضَيْنَا عَلَيْهِ الْمَوْتَ مَا دَلَّهُمْ عَلَىٰ مَوْتِهِ إِلَّا دَابَّةُ الْأَرْضِ تَأْكُلُ مِنسَأَتَهُ"

وهنا عرفت الجن إن سليمان عليه السلام كان ميت بقاله فترة وهمّ ميعرفوش حتى هي أد إيه ولا من إمتى،

واعترفوا بحسرة إنهم فعلا لو كانوا يعرفوا الغيب مكنوش استمروا في التعب والذل والمشقة المستمرين كل ده 😅

"فَلَمَّا خَرَّ تَبَيَّنَتِ الْجِنُّ أَن لَّوْ كَانُوا يَعْلَمُونَ الْغَيْبَ مَا لَبِثُوا فِي الْعَذَابِ الْمُهِينِ"

وطبعا الناس عرفت إن الجن كانوا بيكذبوا عليهم وإنهم مايعرفوش الغيب ولا حاجة😏

 

مدة حكم سليمان عليه السلام كانت أربعين سنة، ومدة حكم داود عليه السلام كانت أربعين سنة..فيكون مجموع المُلك النبوي المستقر الوحيد لبني إسرائيل هو ثمانون عام فقط👌

 

☆صحيح ...هو فين بني إسرائيل مسمعنالهمش صوت خلال السنين دي كلها😮

في عهد داود عليه السلام كان بنو إسرائيل بيحبوه وكان ملك عادل،

سليمان عليه السلام كان عادل وكمان كان ملك قوي ربنا سخّر له كل حاجة فمين مستغني عن عمره عشان يقف في وجه ملك زي سليمان عليه السلام😅

 

◇إيه بقى إللي حصل بعد موت سليمان عليه السلام 🤔

 

ابن عباس رضي الله عنه بيقول إن بعد موت سليمان عليه السلام، الجن بدأت تبحث تحت عرش سليمان عن الكتب التي كان بيكتبها كاتب سليمان،

ويُقال إن الكاتب ده كان اسمه "آصف"، وكان بيكتب فيها كل شيء عن سليمان عليه السلام، عن الملك وعن الشريعة والوقائع والأحداث.. كل شيء.. زي دواوين الحكم كده مثلا..

فلما الشياطين أخرجت الكتب دي، بدأوا يكتبوا ما بين السطور كلمات السحر والكفر ودعاء غير الله،

وخرجوا على الناس إللي همّ بني إسرائيل، وقالوا لهم إن دي كتب سليمان،

وإنه كان مسخّر الجن والطير والريح بالسحر ده،

والناس قرأت الكتب لقت فيها فعلا كلمات السحر والكفر بالله ودعاء غير الله ، فصدقوا للأسف،

"وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ ۖ"

وانتشر بين الناس إن سليمان عليه السلام كان بيتعامل بالسحر وكان كافر بالله🙊

فربنا دافع عن سليمان عليه السلام وقال إنه لم يكفر ولم يكن ساحر وإن الشياطين هم إللي كفروا بيعلموا الناس السحر، وبيعلموهم السحر إللي أُنزل على المَلَكِين هاروت وماروت👌

"وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ"

 

☆مين هاروت وماروت دول🤨

المَلَكِين دول ربنا أنزلهم وجعلهم في صورة رجلين صالحين في مدينة بابل في العراق،

مهمتهم إنهم يدافعوا عن سليمان عليه السلام من الكلام إللي بيتقال عنه إنه ساحر،

فكان الملكين بيعلموا الناس السحر ويوضحوا لهم إن في فرق بين السحر وبين النبوة،

وإن السحر ده ممكن أي حد يتعلمه، أما النبوة فهي اختيار من الله عز وجل ومش حاجة مُكتسبة،

يعني مفيش واحد يعبد ربنا لزمن معين أو يتعلم علم معين فربنا يرزقه النبوة ويبقى نبي، لأ...النبوة والرسالة اصطفاء خااالص من عند ربنا👌

لكن السحر ممكن تتعلموه من أي حد وألاعيبه بتبقى كده و بنوريها لكم من باب إنكم تتعلموا الشر مخافة أن تقعوا فيه، وعشان تعرفوا الفرق بين النبوة وبين السحر،

عشان لما يجيلكم نبي من أنبياء الله لا يتهمه أحد بإنه ساحر وتعرفوا تميزوا هل هو نبي والا ساحر،

لكن لازم تكونوا فاهمين إن السحر ده كُفر بالله، و احنا فتنة واختبار وابتلاء من الله ليكم باللي بنعلمهولكم ده،

فخدوا بالكم هتضيعوا نفسكم لو مسمعتوش تحذيرنا ليكم واستخدمتم السحر إللي احنا علمناهولكم ده👌

"وَمَا يُعَلِّمَانِ مِنْ أَحَدٍ حَتَّىٰ يَقُولَا إِنَّمَا نَحْنُ فِتْنَةٌ فَلَا تَكْفُرْ"

طيب بني إسرائيل عملوا إيه😬

للأسف مسمعوش الكلام وبقوا بيتلقوا العلم ده ويطبقوه، وبقوا يتعلموا من السحر الأمور إللي يفرقوا بيها بين الزوج وزوجته ويخلوهم في كرب وشقاق،

"فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ"

لكن ربنا علمنا أمر مهم جدا، وهو إن مفيش ضرر بيتم عن طريق السحر  ومس الجن إلا بإذن الله،

يعني مش هيحصل أي أذى غير لما ربنا يأذن بكده.. وعلمنا إننا نلتزم بالأذكار وبكثرة قراءة الرقية الشرعية وقراءة  القرآن بالذات سورة البقرة،

"وَمَا هُم بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ ۚ وَيَتَعَلَّمُونَ مَا يَضُرُّهُمْ وَلَا يَنفَعُهُمْ"

 

استمر الإعتقاد بإن سليمان عليه السلام ساحر حتى عهد رسول الله ﷺ، فلما تكلم رسول الله ﷺ عن قصة سليمان وإنه من أنبياء الله، اليهود قالوا:

ده كان ساحر وكافر بالله😏

فنزل القرآن يُبرئ سليمان عليه السلام ويحكي عن إللي شرحناه من شوية ونزلت الآية:

"وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ ۖ وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ "

 

بعد ما الشياطين فتنت الناس بالافتراء الكاذب على سليمان عليه السلام انتشر الفساد والكفر في بني إسرائيل تااااااني😑

وانقسم الناس على أنفسهم، وبدأ الظلم بينهم والتعدي على بعض والبُعد عن كل الفضائل👌

احنا عارفين إن بني إسرائيل كانوا ١٢ سِبْط .. 12 قبيلة يعني لو تفتكروا..

فانقسم الـ١٢ سِبْط لقسمين:

عشر أسباط في قسم اتفقوا على قيادة معينة، وسكنوا شمال فلسطين وكَوّنوا مملكة إسرائيل،

والقسم التاني: الاتنين الأسباط إللي فاضلين،

دول اتفقوا على قيادة تانية خالص، وسكنوا جنوب فلسطين وكَوِّنوا مملكة يَهُوذَا..

وكان السِبْطين دول هما:

◇سِبْط يَهُوذا إللي كان فيه المُلك قبل كده زي داود وسليمان عليهما السلام،

◇والسبط التاني سِبْط بنيامين.

 

مملكة بقى الشمال استمرت حوالي 200 سنة، كلها كُفر وظلم وفساد😶

لحد ما ربنا سلّط عليهم الآشوريين إللي جاءوا من العراق، وأفنوا مملكة إسرائيل، وأخدوا معظم شعب إسرائيل وبعتروه وشتتوه في العالم .. باعوهم هنا وهناك وشردوهم لحد ما فنوا عن آخرهم،

وبكده انتهى تمااااااما من الدنيا بكاملها كل نسل العشرة أسباط دول👌

يعني مابقاش في التاريخ حاجة اسمها يهودي من نسل الأسباط العشرة..

يبقى اتبقى عندنا فقط "ممكلة يهوذا" إللى موجودة في الجنوب، وإللي فيها بيت المقدس.

ومن هنا جت تسمية اليهود، نسبةً إلى نسل يهوذا إللي فيه المُلك..

زاد  الفساد في بني إسرائيل، فربنا بعث فيهم نبي من تاني اسمه شَعِيَا أو أشْعِيا، الاتنين صح.. وكان مَلِك بني إسرائيل في الزمن ده اسمه "حِزْقِيا" وكان مطيع للنبي أشعِيا، لكن بنو إسرائيل كانوا فاسدين كعادتهم..

في يوم مرض الملك وكان في رِجله قُرحة،

في نفس الوقت ده كان ملك بابل مُتجه لبيت المقدس ومعاه ستمائة ألف جندي عشان يغزو بيت المقدس والملك ده كان اسمه "سَنْحَاريب"،

والناس خافت، ووصل الخبر لملك بني إسرائيل الطيب، فسأل الملك النبي أشعِيا: ربنا أوحى لك بإيه عن الجنود دي😥  فالنبي قال: لم يوحي إليّ بشيء عنهم.. ثم نزل وحي على النبي بعدها إنه يقول للملك إنه يكتب وصيته عشان خلاص هيموت قريب..

فقعد الملك يدعي ربنا إنه يُمدّ له في أجله، وكان ملك صالح زي ما قلنا، فربنا استجاب دعاؤه، وأمد له في عمره خمسة عشرة سنة👌

 

☆بس مش الآجال مكتوبة ؟ ومش احنا ماينفعش ندعي بطول العمر🤨

أيوة مكتوبة في اللوح المحفوظ، وفعلا زي ما ربنا قال:

"وَلِكُلِّ أُمَّةٍ أَجَلٌ فَإِذَا جَاءَ أَجَلُهُمْ لا يَسْتَأْخِرُونَ سَاعَةً وَلا يَسْتَقْدِمُونَ"

لكن ده عن الأجل النهائي، فمكتوب عند ربنا إن أجله النهائي هيكون بعد 15 سنة،

وطولة العمر الزيادة دي مكتوب إنها هتحصل، وإن عمره كده كده كان هيبقى تام بال15 دول،

لكن من أسباب تمام العدد بشكل كامل هيكون في دعوة من العبد الصالح ده ربنا هيستجيب لها،

فكل ده مكتوب في اللوح المحفوظ وإللي هو  في علم الله وحده واحنا بنعرفه فقط بعد ما بيقع مش قبلها..

فبالتالي الملك الطيب ده ماتأخرش عن أجله لحظة👌

 

فالملك الصالح شكر ربنا على استجابة دعاؤه وضاعف من تضرعه وذله لله،

فربنا شفى له قدمه من القُرحة وأهلك جيش مَلك بابل ، ماعدا سنحاريب الملك، ومعاه خمسة من أصحابه،

وكان في أصحابه دول واحد اسمه 《بُخْتُنَصَّر》 🙊

فأخد مَلك بني إسرائيل الطيب الناس الستة المهزومين دول، وربطهم في القيود،  وجعل الجنود بتوعه يطوفوا بيهم وسط الناس في البلد إذلالًا لهم..

وبعدين ربنا أوحى للنبي أشعِيا إنه يقول للملك إنه يرسل الست أشخاص دول لبلادهم عشان يحكوا إللي حصل لهم وينذروا قومهم ويخوفوهم منه..

فلما رجع سنحاريب لبابل وحكى إللي حصل معاهم، السحرة والكهنة قالوا له:

ماحنا قلنا لك عن رب الناس دي وإن محدش بيقدر عليه من زمان😑

وعاش سنحاريب بعدها سبع سنين ومات..

لما خلصت الـ15 سنة جاء أجل ملك بني إسرائيل النهائي فمات،

بعد موته بني إسرائيل فجَرُوا وفسقوا  لأبعد الحدود، وانتشر شرَّهم في كل اتجاه.. فأوحى الله لنبيه أشعِيا، إنه يوعظهم وينذرهم ويذكرهم بالله، وإنه هيعاقبهم لو خالفوا أمره واستمروا في طغيانهم..

فلما خلص كلامه معاهم ومواعظه، راحوا قايمين عليه واعتدوا عليه.. كانوا عايزين يقتلوه..

فهرب منهم وطلع يجري لحد ما عدى على شجرة ، فاتفلقت قدامه عشان يدخل فيها فدخل واختبأ منهم،

فالشيطان مسك طرف ثوبه وخلاه بره الشجرة ، فشافوه، فنشروا الشجرة والنبي أشعِيا جواها، وقتلوه قاتلهم الله😞

ومع ذلك ربنا أرسل لهم نبي تاني اسمه أَرْمِيا،

وكان برده بيوعظهم وينهاهم عن فسقهم و شرهم وإنهم لو مستجبوش ربنا هيرسل عليهم ملك جبار قاسي يخرب بلدهم ويقتلهم، وفعلا أرميا نفّذ كلام ربنا كله وحذرهم ، لكنهم كذبوه وقالوا عليه مجنون😑》》

 

¤طب هو ليه ربنا يحذر بني إسرائيل أصلا 🤔

عشان يعلمهم ويعلم كل الأمم إللي هتيجي بعد كده، إن مهما كانت جرائم الإنسان وذنوبه عظيمة وكتيرة، فلو تاب وأصلح ومشي في الطريق الصح، ربنا هيتوب عليه ويقبله ويعفو عنه،

لكن لو أصر على طغيانه وعصيانه، ربنا هيعاقبه ويعذبه بألوان العذاب،

يسلط عليه حد يُؤذيه مثلا، أو يبتليه بمرض يُذله ويقعده، أو يبتليه بفقر يفضح ستره ويحوِجه للسؤال مثلا...

ولو حد فلت من عقاب الدنيا لحكمة إلهية، فعقاب الآخرة موجود👌

 

في الوقت ده كان مَلك بابل في بلاد العراق معروف بقوته وبطشه،

فكان يقود جيوشه عشان يحتل البلاد، الملك ده كان اسمه 《بُخْتُنصّر》🙊

 

☆فاكرين لما قلنا إن الأرض حكمها أربعة ملوك: اثنين كفار واثنين مؤمنين؟

الاتنين الكفار كانوا: النمرود و بُخْتُنصّر.

والاتنين المؤمنين كانوا : ذو القرنين وسليمان بن داود عليهما السلام.

وإذا أراد الله شيئا هيأ أسبابه👌

فاكرين بني إسرائيل عملوا إيه في سنحاريب وبختنصر من كم سنة فاتت وذلوهم إزاي🤭

لما بنو إسرائيل عصوا أمر الله وطغوا في الأرض وبدأوا يقتلوا الأنبياء، ربنا ألقى في قلب بُخْتُنصّر إنه يروح يغزو بني إسرائيل مرة ثانية👌

فاتحرك بالجيش بتاعه في اتجاه بيت المقدس.. ففي الطريق لما وصل لدمشق، أهل دمشق خافوا منه، فقدموا له الهدايا والأموال واتصالحوا معاه،

فتركهم بُخْتُنصّر واتجه لبيت المقدس، فمَلِك بني إسرائيل في الزمن ده اتعاهد مع بُخْتُنصّر برده بنفس الطريقة زي ما أهل دمشق عملوا معاه،

وأخد بختنصر بعض أثرياء بني إسرائيل معاه، وقرر إنه يرجع للعراق..

فساعتها بنو إسرائيل اعترضوا على ملكهم وإللي عمله ده وغضبوا إنه إزاي يعمل كده.. فراحوا قاتلينه ونقضوا الصلح مع بُخْتُنصّر😐

فبختنصر رجعلهم تاني وحاصر مدينة القدس فترة، فلما طال الحصار استسلموا لبختنصر، وفتحوا أبواب المدينة..

دخل بختنصر المدينة وحرَقها وقتل المقاتلين وسبى النساء والأطفال، وحرَّق التوراة، وخرَّب الحصون وهدم محاريب العبادة..

يعني أنزل بيهم العذاب والعقاب إللي فعلا  يستحقوه👌

"وَقَضَيْنَا إِلَىٰ بَنِي إِسْرَائِيلَ فِي الْكِتَابِ لَتُفْسِدُنَّ فِي الْأَرْضِ مَرَّتَيْنِ وَلَتَعْلُنَّ عُلُوًّا كَبِيرًا"

مش بس كده، ده كمان بختنصر أخد معاه إلى أرض العراق ٤٠ ألف من اليهود كعبيد، عشان يخدموا أهل بابل زي ماخدموا الفراعنة في مصر😏

وفي بعض اليهود هربوا منه لمصر في الوقت ده.. وبكده انتهى تماااما الحكم اليهودي في فلسطين👌

همّ اليهود هيرجعوا تاني بعدين زي ماهنشوف، لكن مش هيرجعوا كحكام للبلد،

"فَإِذَا جَاءَ وَعْدُ أُولَاهُمَا بَعَثْنَا عَلَيْكُمْ عِبَادًا لَّنَا أُولِي بَأْسٍ شَدِيدٍ فَجَاسُوا خِلَالَ الدِّيَارِ ۚ وَكَانَ وَعْدًا مَّفْعُولًا "

☆فكان العلو الأول لبني إسرائيل👆 في زمن داود وسليمان عليهما السلام..

فلما كفروا وطغوا وأفسدوا، ربنا أرسل عليهم إللي يهلكهم ويذلهم، إللي هو بختنصر وجنوده،

إللي هي: "بَعَثْنَا عَلَيْكُمْ عِبَادًا لَّنَا أُولِي بَأْسٍ شَدِيدٍ فَجَاسُوا خِلَالَ الدِّيَارِ "

وأي حد سواء مسلم أو كافر فهو عبد لله غصب عنه👌

 

وبالنسبة للعُلو الثاني، فلعله يكون هو إللي احنا شايفينه دلوقتي بيحصل لليهود ، في أرض فلسطين وأجزاء من لبنان ومن سوريا،

بقى ليهم اتصالات إقتصادية على أعلى مستوى في العالم، وبقى في دول كبيرة واقفة معاهم، وبقى ليهم هيبة سياسية ووزن في صناعة القرار على مستوى العالم،

ولسه بيخططوا في التوسع أكتر وأكتر عشان يقيموا دولة إسرائيل الكبرى المزعومة بتاعتهم... وكل ده داخل ضمن العُلو في الأرض ،

"ثُمَّ رَدَدْنَا لَكُمُ الْكَرَّةَ عَلَيْهِمْ وَأَمْدَدْنَاكُم بِأَمْوَالٍ وَبَنِينَ وَجَعَلْنَاكُمْ أَكْثَرَ نَفِيرًا"

فاحنا حاليا مستنيين البشارة الثانية إللي جت في الآية بعد كده، إن ربنا يرسل عليهم إللي يعلمهم الأدب تاني ويعيدوا الكرة تاني عليهم، زي ما ربنا قال:

 "فَإِذَا جَاءَ وَعْدُ الْآخِرَةِ لِيَسُوءُوا وُجُوهَكُمْ وَلِيَدْخُلُوا الْمَسْجِدَ كَمَا دَخَلُوهُ أَوَّلَ مَرَّةٍ وَلِيُتَبِّرُوا مَا عَلَوْا تَتْبِيرًا"

فإذا جاء وعد الآخرة يعني: المرة الثانية 👌

 

المهم،

كان من ضمن إللي بُخْتُنصّر أسرهم: نبي من أنبياء الله اسمه دانيال..

فلما مشي بختنصر من مدينة القدس ووصل للعراق بالأسرى، مسك النبي دانيال وحطه في بئر كبير وحط معاه أسدين عشان ياكلوه