أفضل سرد لقصة سيدنا شعيب ( عليه السلام ) بشكل جذاب

 

أفضل سرد لقصة سيدنا شعيب ( عليه السلام ) بشكل جذاب   

السلام عليكم ورحمة الله وبركاته ، زوار الموقع الكرام اليوم موعدكم مع أفضل سرد لقصة سيدنا شعيب ( عليه السلام ) بشرح مبسط وشيق من إعداد الأستاذة جميلة الصعيدي جزاها الله خيرا

 

قصة شعيب

بعد هلاك قوم لوط إللي تكلمنا عليهم قبل كده؛ بعد كم سنة في مكان قريب منهم كان في قبيلة اسمها مَديَن، أهل مدين دول كانوا ناس كفار بيعبدوا شجرة اسمها الأَيْكة،

وكانوا من أسوأ الناس معاملة

لما يكونوا بيبيعوا حاجة بيُقللوا الميزان لمصلتحهم،

أو يبيعوا مثلا القماش ناقص بفلوس زيادة، يعني يبيعوا ٩٠سم قماش بسعر متر،

لكن لما هم إللي يشتروا  بياخدوا زيادة عن حقهم ...يعني ياخدوا بالزيادة ويدفعوا بالناقص.

 

ولو بصينا في حياتنا هنلاقي ناس كتير بتعمل كده إلا من رحم الله،

لما تيجي تشتري حاجة تلاقيها عمالة تفاصل وتفاصل لحد ما تبخس ثمن الحاجة وتجيبها الأرض

لكن تعالوا شوفوهم لما يكون فيها مصلحتهم تلاقيهم بيزودوا السعر ويحلفوا بالله كذب عادي جدا إن الحاجة دي سعرها كده

ودول اللي ربنا قال عنهم في القرآن "المُطَفّفِين" وتوعّدهم بالويل والعياذ بالله

 

وكان أهل مدين قطّاعين طُرق...بيطلعوا على الطريق ويخوّفوا المسافرين وياخدوا أموالهم وحاجتهم، كانو بأفعالهم أشبه بقوم لوط،

فلأن ربنا رحيم ومش بيعذب حد ولا يُهلكه إلا لما يبعتله حد يُذكره ويُوعظه ويُنبهه، ربنا أرسل لهم واحد منهم اسمه شعيب.

"وَمَا كُنَّا مُعَذِّبِينَ حَتَّىٰ نَبْعَثَ رَسُولًا"

شعيب عليه السلام كان زيه زي باقي الأنبياء لم يعبد صنم أبدا ولم يكفر بالله أبدا...كلهم على الفطرة...

يعني كل إنسان ربنا بيخلقه بيكون على فطرة الإسلام والتوحيد،

وبعدين بقى يبدأ التغيير فيه من إللي حواليه وخصوصا الأب والأم إللي ليهم التأثير الأكبر على عقيدة الطفل،

فالأنبياء والرسل ربنا حفظهم بفطرتهم لحد ما تجيلهم الرسالة

فربنا أوحى لشعيب عليه السلام إنه هيكون رسول لقومه عن طريق جبريل فجبريل عليه السلام هو المَلك المسؤول عن تبليغ الوحي للأنبياء،

ويُقال إن شعيب عليه السلام من ذرية إبراهيم عليه السلام لكن مفيش دليل على كده،

 وخصوصا إن شعيب عليه السلام من الأنبياء العرب العاربة إللي رسول الله ﷺ  ذكرهم في الحديث، إن الأنبياء العرب أربعة، وإبراهيم عليه السلام مكنش عربي وأول عربي مُستعرِب هو إسماعيل عليه السلام

 

عالعموم نسبه مش هيفيدنا بشيء.. لأنه لو كان هيفيدنا كان ربنا قالنا سواء في القرآن أو في السنة،

فربنا دايما بيقولنا على الحاجات إللي هتنبني عليها حاجة مفيدة لينا،

لكن الحاجة إللي مش هتفيدنا مش بيذكرها زي مثلا مرات إبليس اسمها إيه ولّا هو متزوج أصلا ولّا لأ

 

فاللي يهمنا إن شعيب عليه السلام نبي مرسل لقوم مدين إللي كانوا قريبين من مكان وزمان قوم لوط،

"وَإِلَى مَدْيَنَ أَخَاهُمْ شُعَيْبًا "

 

أول حاجة دعاهم ليها كعادة الأنبياء زي ما قبل كده

هي:

إنهم يعبدوا الله وحده...ربنا إللي خلقهم وبيرزقهم وبيشفيهم إذا مرضوا ملوش شريك ولا له ولد هو الخالق الوحيد للكون ده،

ونصحهم إنهم يوفوا المكيال ويرجعوا للناس أموالهم، وميخدوش زيادة عن حقهم ...ورزق ربنا أحسن لهم من إنهم ياخدوا أموال الناس بالباطل.

"قَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ قَدْ جَاءتْكُمْ بَيِّنَةٌ مِنْ رَبِّكُمْ فَأَوْفُوا الْكَيْلَ وَالْمِيزَانَ وَلَا تَبْخَسُوا النَّاسَ أَشْيَاءهُمْ ولاَ تَعْثَوْا في الأرضِ مُفْسِدِين"

 

ربنا إللي بيرزق و بيبارك في الأموال، لو انتم مشيتم في طريق غلط لجمع الأموال دي ربنا مش هيبارك وهتفتقروا،

فالحلال فيه بركة حتى لو كان قليل، والحرام هيفنى سريعا ويَمحقُه الله حتى لو كان كثير،

"بَقِيَّةُ اللَّهِ خَيْرٌ لَكُمْ إِنْ كُنْتُمْ مُؤْمِنِينَ وَمَا أَنَا عَلَيْكُمْ بِحَفِيظٍ"

 

وأنا بعمل إللي بقولكم عليه...مش بقولكم على الحاجة وأعمل عكسها، أنا كل إللي عايزه هو الإصلاح على أد ما أقدر وأعمل إللي عليّ والتوفيق من عند ربنا.

"وَمَا أُرِيدُ أَنْ أُخَالِفَكُمْ إِلَى مَا أَنْهَاكُمْ عَنْهُ إِنْ أُرِيدُ إِلَّا الْإِصْلَاحَ مَا اسْتَطَعْتُ وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ"

 

ودي الدعوة إلى الله بالقدوة

لما تحب تدعي حد حاول تكون قدوة في إللي بتدعي ليه الناس على أد ما تقدر لأن ده بيكون أكثر تأثيراً في قلوب الناس،

 

المهم، قوم شعيب قالوا له:

هي الصلاة إللي إنت بتصليها هي إللي أمَرِتك إننا نسيب عبادة الأَيْكة إللي كان بيعبدها آباؤنا أو نعمل في فلوسنا إللي إحنا عايزينه

ده إيه الصبر والبصيرة إللي إنت فيها دي

احنا كنا عارفينك أعقل وأَرشد من كده

"قَالُوا يَاشُعَيْبُ أَصَلَاتُكَ تَأْمُرُكَ أَنْ نَتْرُكَ مَا يَعْبُدُ آبَاؤُنَا أَوْ أَنْ نَفْعَلَ فِي أَمْوَالِنَا مَا نَشَاءُ إِنَّكَ لَأَنْتَ الْحَلِيمُ الرَّشِيدُ "

 

فقال لهم :

افتكروا نعمة ربنا عليكم وإزاي كنتم مجموعة صغيرة وربنا زوّد في عددكم، اتقوا ربنا إللي خلقكم أنتم وآباؤكم، واستغفروا ربنا وتوبوا ده ربنا رحيم وودود وبيقبل التوبة

"وَاذْكُرُوا إِذْ كُنْتُمْ قَلِيلًا فَكَثَّرَكُمْ"

"وَاسْتَغْفِرُوا رَبَّكُمْ ثُمَّ تُوبُوا إِلَيْهِ إِنَّ رَبِّي رَحِيمٌ وَدُودٌ"

 

فقالوا له:

إنت شكلك اتسحرت

"قَالُوا إِنَّمَا أَنْتَ مِنَ الْمُسَحَّرِينَ"

 

فقال لهم:

طيب لو وريتكم معجزة من ربكم تثبت لكم إني نبي من عند ربنا وتطمنكم، وتأكد لكم إني مش بتكلم من نفسي، فاسمعوا الكلام بقى

"قَدْ جَاءتْكُمْ بَيِّنَةٌ مِنْ رَبِّكُمْ"

 

☆ملحوظة:

مفيش أي دليل من القرآن أو السنة عن إيه هي تحديدا معجزة شعيب عليه السلام، فمفيش داعي للكلام فيها بكلام لا ينبني عليه عمل زي ما قلنا

 

فقال له قومه:

إحنا مش حابين كلامك ده ولا عايزين نسمعه ومش فاهمين إنت بتقول إيه أساسا

وإنت ضعيف أصلا ولولا عيلتك كنا حدفناك بالطوب لحد ما نقتلك لإن انت شخصيا مش عزيز علينا في شيء ولا غالي علينا يعني

"قَالُوا يَاشُعَيْبُ مَا نَفْقَهُ كَثِيرًا مِمَّا تَقُولُ وَإِنَّا لَنَرَاكَ فِينَا ضَعِيفًا وَلَوْلَا رَهْطُكَ لَرَجَمْنَاكَ وَمَا أَنْتَ عَلَيْنَا بِعَزِيزٍ "

 

على فكرة شعيب عليه السلام يُسمى خطيب الأنبياء بسبب فصاحته وحُسْن كلامه...ودول بيقولوا احنا مش فاهمين إنت بتقول إيه

وطبعا مفيش جديد

 هي دي عادة المُعاندين المتكبرين في كل زمان، من ظلم وبهتان وسخرية واستهانة وغرور وتجبر وكتمان للحق والعياذ بالله،

 

فرد عليهم وقال:

بقى معقولة عيلتي أعز عندكم من ربنا

بقى بتراعوني عشان خايفين من عيلتي ومش خايفين من ربنا إنكم بتؤذوا رسوله إللي جايلكم ببرهان مُبين من عنده عز وجل

"قَالَ يَاقَوْمِ أَرَهْطِي أَعَزُّ عَلَيْكُمْ مِنَ اللَّهِ وَاتَّخَذْتُمُوهُ وَرَاءكُمْ ظِهْرِيًّا إِنَّ رَبِّي بِمَا تَعْمَلُونَ مُحِيطٌ"

 

طيب....

اصبروا بقى لحد ما ربنا هو إللي يحكم بيني أنا وإللي آمنوا معايا وبينكم.

"وَإِنْ كَانَ طَائِفَةٌ مِنْكُمْ آمَنُوا بِالَّذِي أُرْسِلْتُ بِهِ وَطَائِفَةٌ لَمْ يُؤْمِنُوا فَاصْبِرُوا حَتَّى يَحْكُمَ اللَّهُ بَيْنَنَا وَهُوَ خَيْرُ الْحَاكِمِينَ"

 

فقالوا له بكل كِبر:

يا إما نطردك برة البلد إنت وإللي اتبعوك دول أو ترجعوا عن إللي في دماغكم ده وتكونوا على دينا

"قَالَ الْمَلَأُ الَّذِينَ اسْتَكْبَرُوا مِنْ قَوْمِهِ لَنُخْرِجَنَّكَ يَاشُعَيْبُ وَالَّذِينَ آمَنُوا مَعَكَ مِنْ قَرْيَتِنَا أَوْ لَتَعُودُنَّ فِي مِلَّتِنَا"

 

قال لهم: محدش أبدا هيرجع للكفر بعد ما ذاق حلاوة الإيمان بالله إلا وهو مُكره،

ده احنا لو رجعنا عن الحق إللي ربنا هدانا ليه يبقى بننكر إنه حق وبنفتري على ربنا الكذب ...عايزينا نرجع بعد ما ربنا نجانا من الضلال ده

"قَالَ أَوَلَوْ كُنَّا كَارِهِينَ قَدِ افْتَرَيْنَا عَلَى اللَّهِ كَذِبًا إِنْ عُدْنَا فِي مِلَّتِكُمْ بَعْدَ إِذْ نَجَّانَا اللَّهُ مِنْهَا"

إحنا مش هنرجع أبدا إلا لو ربنا أراد حاجة تانية هو ملجأنا

وهو إللي هينصرنا 

"وَمَا يَكُونُ لَنَا أَنْ نَعُودَ فِيهَا إِلَّا أَنْ يَشَاءَ اللَّهُ رَبُّنَا وَسِعَ رَبُّنَا كُلَّ شَيْءٍ عِلْمًا عَلَى اللَّهِ تَوَكَّلْنَا "

 

☆ده إيه التسلط بتاع قوم شعيب ده

 يا تبقى معايا وعلى مزاجي يا إما هطردك وهأذيك

 

قوم شعيب عليه السلام بقى قعدوا يقولوا للمؤمنين لو مشيتم ورا شعيب هتخسروا ...مش هتلاقوا فلوس

"وَقَالَ الْمَلَأُ الَّذِينَ كَفَرُوا مِنْ قَوْمِهِ لَئِنِ اتَّبَعْتُمْ شُعَيْبًا إِنَّكُمْ إِذًا لَخَاسِرُونَ "

 

فشعيب عليه السلام بدأ يخوّفهم ويقولهم متخافوش كرهكم لي أو لكلامي يخليكم متتبعوش الحق،

لو أسلوبي مش عاجبكم وشايفين إني ضعيف وإن فيه أفصحُ مني لسانًا وأَبْيَنُ كلامَا واني لا أستحق النبوة والرسالة إللي ربنا أنزلها عليّ اتبعوا الحق وملكوش دعوة بناقل الحق،

ربنا هيسألكم عن الحق إللي جالكم...

مش هتقدروا تقولوا ساعتها أصل أسلوبه كان وحش...

أو تقولوا إشمعنى هو إللي يقولنا كده وهو ضعيف.

يا جماعة اتعظوا باللي حصل قبل كده،

قوم نوح وقوم هود وقوم صالح قالوا نفس كلامكم ...وكانت نهايتهم إيه؟...ونهاية قوم لوط بالذات مش بعيدة عنكم

 

"وَيَا قَوْمِ لَا يَجْرِمَنَّكُمْ شِقَاقِي أَنْ يُصِيبَكُمْ مِثْلُ مَا أَصَابَ قَوْمَ نُوحٍ أَوْ قَوْمَ هُودٍ أَوْ قَوْمَ صَالِحٍ وَمَا قَوْمُ لُوطٍ مِنْكُمْ بِبَعِيدٍ "

 

فقالوا له: بص إنت بشر زينا وإحنا شايفينك كذاب

"وَمَا أَنْتَ إِلَّا بَشَرٌ مِثْلُنَا وَإِنْ نَظُنُّكَ لَمِنَ الْكَاذِبِينَ "

لو إنت فعلا صادق هات العذاب إللي إنت بتقول عليه ده

"فَأَسْقِطْ عَلَيْنَا كِسَفًا مِنَ السَّمَاءِ إِنْ كُنْتَ مِنَ الصَّادِقِينَ"

 

فقال لهم شعيب عليه السلام :

خلااااص انتهى الأمر،

كل واحد هيخليه زي ماهو بدماغه براحته خالص،

وربنا عالم بأفعالكم ...إنتم كملوا إللي بتعملوه وإحنا هنكمل في إللي بنعمله وبكرة تشوفوا مين إللي هيجيله العذاب ومين هو الكذاب، استنوا وأنا مستني معاكم

"وَيَا قَوْمِ اعْمَلُوا عَلَى مَكَانَتِكُمْ إِنِّي عَامِلٌ سَوْفَ تَعْلَمُونَ مَنْ يَأْتِيهِ عَذَابٌ يُخْزِيهِ وَمَنْ هُوَ كَاذِبٌ وَارْتَقِبُوا إِنِّي مَعَكُمْ إِنِّي مَعَكُمْ رَقِيبٌ"

ودعا شعيب عليه السلام وقال:

"رَبَّنَا افْتَحْ بَيْنَنَا وَبَيْنَ قَوْمِنَا بِالْحَقِّ وَأَنْتَ خَيْرُ الْفَاتِحِينَ "

 

بعد فترة أصاب قوم مدين حر شديد جدا وسكنت الريح مفيش أي نسمة هوا لمدة سبعة أيام ومكنش بينفعهم ظل ولا ماء فخرجوا من البيوت للصحراء لعل وعسى يلاقوا طريقة للنجاة من الكرب ده،

فربنا أرسل عليهم سحابة فاجتمعوا تحتها عشان تظللهم من حر الشمس،

وأتاريها الظُّلة إللي فيها هلاكهم النهائي والعياذ بالله

"فَكَذَّبُوهُ فَأَخَذَهُمْ عَذَابُ يَوْمِ الظُّلَّةِ إِنَّهُ كَانَ عَذَابَ يَوْمٍ عَظِيمٍ"

 

فربنا زلزل الأرض من تحتهم زلزال شديد وأرسل عليهم الصيحة.

 "وَأَخَذَتِ الَّذِينَ ظَلَمُوا الصَّيْحَةُ فَأَصْبَحُوا فِي دِيَارِهِمْ جَاثِمِينَ * كَأَنْ لَمْ يَغْنَوْا فِيهَا أَلَا بُعْدًا لِمَدْيَنَ كَمَا بَعِدَتْ ثَمُودُ"

وأمطر عليهم من السحابة الشرر والشهب، وماتوا جميعا موتة بشعة، ووشهم مدفوس في التراب في مشهد كله ذُل وصَغار وإهانة وتعذيب لهم

ونجّى الله شعيبا ومن آمن معه...

"وَلَمَّا جَاءَ أَمْرُنَا نَجَّيْنَا شُعَيْبًا وَالَّذِينَ آمَنُوا مَعَهُ بِرَحْمَةٍ مِنَّا "

ورجع شعيب عليه السلام ،

عشان يشوف إللي حصل لقومه، فقالهم وهو بيعاتبهم:

أنا بلغتكم رسالة ربنا ونصحتكم بس إنتم إللي مسمعتوش الكلام فإزاي أزعل على إللي حصل لناس كافرين زيكم، جحدوا نعمة ورحمة ربهم ورفضوها ؟!!

"فَتَوَلَّى عَنْهُمْ وَقَالَ يَاقَوْمِ لَقَدْ أَبْلَغْتُكُمْ رِسَالَاتِ رَبِّي وَنَصَحْتُ لَكُمْ فَكَيْفَ آسَى عَلَى قَوْمٍ كَافِرِينَ"

《وهم كانوا سامعينه على فكرة ربنا بيخليهم يسمعوا زيادة في الألم والحسرة والعذاب》

 

عرفتم مين الكذاب ...عرفتم مين الخسران...

عرفتم مين إللي كان على حق ومين إللي كان على باطل؟

بس خلاص ندمتم في وقت مينفعش فيه الندم.

"الَّذِينَ كَذَّبُوا شُعَيْبًا كَأَنْ لَمْ يَغْنَوْا فِيهَا الَّذِينَ كَذَّبُوا شُعَيْبًا كَانُوا هُمُ الْخَاسِرِينَ"

 

آخر نقطة

وهي إن أهل مدين دول غير أهل مدين إللي موسى عليه السلام هيروح لهم بعدين،

وشعيب عليه السلام مش هو أبو المرأة إللي موسى هيتزوجها،

أولا: لأن  القرآن والسنة لم يذكروا أي حاجة عن الموضوع ده.

ثانيا : المؤمنين من قوم شعيب مش هيسيبوا بنات نبيهم هم إللي يروحوا يسقوا الغنم.

ثالثا:

الفرق الزمني بين موسى عليه السلام وشعيب عليه السلام كبير جدا ...بينهم مئات السنين.

فالشيخ الكبير أبو البنتين هو رجل صالح من أهل مدين، وليس شعيب عليه السلام